დღეს საქართველოს რეგიონული განვითარებისა და ინფრასტრუქტურის მინისტრის მოადგილე, გიორგი ამაშუკელი „Elsamex Group“-ის წარმომადგენლებს შეხვდა. როგროც “თბილისი თაიმსს” სამინისტროდან აცნობეს, აღნიშნული შეხვედრა გაცნობითი ხასიათის იყო.
მათივე ინფორმაციით, „Elsamex Group“ საქართველოში ინფრასტრუქტურული პროექტების განხორციელებით დაინტერესდა. უმსხვილესი ინდური სამშენებლო-საინვესტიციო კომპანია სხვადასხვა ინფრასტრუქტურულ პროექტებს უკვე ახორციელებს მსოფლიოს 30-ზე მეტ ქვეყანაში. ამ კომპანიის წლიური ბრუნვა ჯამში 40 მილიარდ აშშ დოლარს აჭარბებს. „Elsamex Group“ ამჟამად ამიერ კავკასიაში გაფართოებასაც გეგმავს.
გიორგი ამაშუკელთან შეხვედრის დროს, კომპანიის წარმომადგენლებმა ისაუბრეს მათ მიერ სხვადასხვა ქვეყნებში განხორციელებულ პროექტებზე საგზაო ინფრასტრუქტურის, ხიდების, გვირაბების, აეროპორტების მშენებლობისა და სხვა მიმართულებით.
თავის მხრივ, საქართველოს რეგიონული განვითარებისა და ინფრასტრუქტურის მინისტრის მოადგილემ ელსამექს ჯგუფის წარმომადგენლებს ინფორმაცია მიაწოდა იმ ინფრასტრუქტურული პროექტების შესახებ, რომლის განხორციელებასაც სამინისტრო ახლო მომავალში გეგმავს. ასევე, მნიშვნელოვანი ყურადღება დაუთმო სამუშაოების წარმოების ხარისხსა და პროექტის კონტრაქტით გათვალისწინებულ ვადებში დასრულებას.
მხარეებმა იმედი გამოთქვეს, რომ მათი ურთიერთთანამშრომლობა შედგება და ერთობლივი მუშაობა წარმატებული და ნაყოფიერი იქნება.
04.06.14
