კომპოზიტორთა სახლი, რომელიც თბილისში, აღმაშენებლის გამზირზე მდებარეობს საზოგადოების ყურადღების ქვეშ მოექცა. აღმაშენებლის გამზირის მცხოვრებლები თვეების განამვლობაში ამ დაწესებულებას არალეგარულ ბიზნესს უკავშირებდნენ. სკანდალი მას შემდეგ დაიწყო, როდესაც კომპოზიტორთა კავშირის პირველ სართულზე არსებული ფართი არაბმა ბიზნესმენმა შეისყიდა. ამ უკანასკნელმა შენობაში გახსნა დაწესებულება „ბეირუთის ღამე“, რომელიც ადგილობრივების უკმაყოფილებას გახსნის დღიდან იწვევს.
არასამთავრობო ორგანიზაციას, „ანტიკორუფციული კავშირი“ ხელში ჩაუვარდა ის ვიდეო მასალა, რომელზეც მათი თქმით, ასახულია შენობაში პროსტიტუციის ფაქტი, ამას გარდა კავშირის ხელმძღვანელი გიორგი ბურჯანაძე ამტკიცებს, რომ „ბეირუთის ღამე“ სტუმრებს 13–14 წლის გოგონების სექსუალურ მომსახურებას სთავაზობს. შესაბამისი ფარული ჩანაწერები კი ორგანიზაციამ საგამოძიებო უწყებას უკვე გადასცა. ამ საკითხზე, „თბილისი თაიმსს“ გიორგი ბურჯანაძე ესაუბრა.
- თქვენი ინფორმაციით, ბატონო გიორგი, რა ხდება კომპოზიტორთა სახლის კედლებში? როდიდან ფიქსირდება მსგავსი ფაქტები?
ზემოთ აღნიშნულ ობიექტში, როგორც ცნობილია ფუნქციონირებს სტრიპტიზისა და ღამის კლუბი, რასაც ხშირად სტუმრობენ საქართველოში მცხოვრები არასრულწლოვანი გოგოები, რომელთა წლოვანება 14 წელს არ აღემატება, ეს ბავშვები ჩათრეულები არიან პროსტიტუციაში, რასაც ასახავს ჩვენს მიერ მოპოვებული ვიდეო მასალა. თან ქართველ მამაკაცებს არ უშვებენ, ჩვენმა თანამშრომელმა მოახერხა იქ შესვლა, დაცვას გაესაუბრა. ამას გარდა, უნდა აღვნიშნოთ ისიც, რომ ეს არ არის ახალი ამბავი, კლუბი უკვე, რამდენიმე წელია ფუნქციონირებს.
- კონკრეტულად თქვენი და თქვენი ორგანიზაციის „ანტიკორუფციული კავშირის“ მხრიდან რა კონკრეტული ნაბიჯები გადაიდგა ამ პრობლემის გამოსაშკარავებლად და მის მოსაგვარებლად?
ფარული ჩანაწერი, რომელიც ჩვენი თანამშრომლის მიერ არის გადაღებული ნათლად ასახავს იმას, რაც შენობაში ხდება. ჩანაწერში ისმის საუბარი, სადაც ეს პიროვნებები ჩვენს თანამშრომელს უსახელებენ თანხას, სთავაზობებ ნომრებს, და კიდევ იმას, რომ გვიან ღამით მოვიდნენ, რადგან ამ დროს პატარა გოგონებიც ჰყავთ და თუ მათგან მომსახურების მიღება უნდათ სწრაფად უნდა აარჩიონ, რადგან მერე „მიჰყავთ“. ჩვენ მოსახლეობისგან მიღებული ინფორმაცია გადავამოწმეთ, რაც დადასტურებულია სწორედ ამ ფარული ჩანაწერით და გადავეცით შესაბამის უწყებებს.
- რა ეტაპზეა ამ დროისთვის გამოძიება და ჩართულნი არიან თუ არა სახელმწიფო უწყებები?
შინაგან საქმეთა სამინისტრომ მზადყოფნა გამოთქვა ამ პრობლემის მოსაგვარებლად, როგორც ზემოთ აღვნიშნე ვიდეო ჩანაწერი გადავეცით მათ და მიმდინარეობს გამოძიება, ნებისმიერ ეტაპზე თუ, რაიმე სიახლე იქნება შეგვატყობინებენ.
- თქვენ გამოსავალს რაში ხედავთ?
პირადად ჩემი, როგორც მოქალაქის, უფლება დამცველის, მამის პოზიციაა, რომ უნდა გაუქმდეს საჯარო ხელშეკრულება კომპოზიტორთა სახლის ადმინისტრაციასა და გასართობ კლუბს შორის და ყველა ასეთი დაწესებულება უნდა იყოს საზოგადოებისგან დევნის ობიექტი.
“თბილისი თაიმსი“ ასევე დაუკავშირდა კომპოზიტორთა სახლის თავჯდომარეს, კახი ცაბაძეს, რომელმაც აღნიშნულ ფაქტს მის მიმართ ცილისწამებლური უწოდა და სიმართლის დამტკიცებას სასამართლოს გზით აპირებს.
„ ეს არის საშინელი ცილისწამება, ცილისწამება გამგეობისა და ხელმძღვანელის წინააღმდეგ. შევხვდი ადვოკატს, გოჩა სვანიძეს, რომელიც ცილისწამებისთვის რამდენიმე დღეში სარჩელს შეიტანს სასამართლოში. როდესაც ამ ბრალდების შესახებ გავიგე, მე წავედი პოლიციაში , მივიყვანე ისინი ადგილზე და მათ დაწერეს დასკვნა. სხვები კი გაზეთებსა და ტელევიზიებში წავიდნენ. კიდევ ერთხელ ვიმეორებ ეს არის ცილისწამება და ალბათ, თქვენ ბოლო ხართ ვისთანაც ამ საკითხზე ვისაუბრე, რადგან კომენტარს არ გავაკეთებ სანამ სასამართლო არ დასრულდება.“
05.06.14
ნათია კეკენაძე