მთავრობამ დღეს განიხილა და მხარი დაუჭირა 550 დევნილი ოჯახისთვის საცხოვრებელი ბინების საკუთრებაში სიმბოლურ – ერთ ლარად გადაცემის საკითხს“,-ეს განცხადება ოკუპირებული ტერიტორიებიდან იძულებით გადაადგილებულ პირთა, დევნილთა და განსახლების მინისტრმა დავით დარახველიძემ მთავრობის სხდომის დასრულების შემდეგ გააკეთა.
მინისტრის თქმით, ეს მიმდინარე წელს, დევნილებისთვის ბინების გადაცემის მეორე ეტაპი იქნება. ბინები აქამდე 842 ოჯახს გადაეცა.
“ამჟამად ეკონომიკის სამინისტროში დამუშავებაშია 502 ოჯახისთვის საცხოვრებელი ბინების გადაცემა. ყველა ერთად დაახლოებით ორი ათას ოჯახამდე იქნება. ჩვენ წლის ბოლომდე კიდევ ვგეგმავთ, რომ 5 ათასამდე ოჯახს გადაეცეს საკუთრებაში საცხოვრებელი ბინები”, – განაცხადა დარახველიძემ.
მისი თქმით, ბინები დევნილებს, საქართველოს მასშტაბით, თითქმის ყველა მუნიციპალიტეტში გადაეცათ. თუმცა, ყველაზე მეტი – 289 ბინა თბილისში.
06.06.14
