საქართველოს ახალგაზრდა იურისტთა ასოციაციამ კვლევის – “საყდრისი-ყაჩაღიანი კულტურული მემკვიდრეობიდან ოქროს თანამედროვე მოპოვებამდე” პრეზენტაცია გამართა.
როგორც საია-ს ხელმძღვანელმა, კახა კოჟორიძემ განაცხადა, კვლევა, ერთი მხრივ, დაკავშირებულია საყდრისი-ყაჩაღიანის, როგორც კულტურული მემკვიდრეობის ობიექტის ირგვლივ განვითარებულ მოვლენებზე, მეორე მხრივ – საზოგადოებისთვის ამ დრომდე ნაკლებად ცნობილ სახელმწიფოს მიერ გაცემულ იმ ლიცენზიაზე, რომელიც მნიშვნელოვანია საყდრისზე სრული წარმოდგენის შესაქმნელად. მისივე განმარტებით, კვლევაში წარმოდგენილია ასევე ინფორმაცია იმ კომპანიების შესახებ, რომლებიც ბოლო წლებში აქტიურად არიან ჩართული ძვირფასი ლითონების მოპოვების პროცესში.
როგორც კვლევაშია აღნიშნული, საყდირისი-ყაჩაღიანთან დაკავშირებით შპს RMG GOLD-ს არ უნდა ჰქონოდა განსაკუთრებული ეკონომიკური გათვლა საყდრისი-ყაჩაღიანი უბანზე, რადგანაც 2009 წელს, როცა ლიცენზია კომპანიის ხელში გადავიდა, საყდრისი-ყაჩაღიანი უკვე წარმოადგენდა ეროვნული კატეგორიის მნიშვნელობის კულტურული მემკვიდრეობის ძეგლს.
ასევე კვლევის მიხედვით, 11-კაციანი კომისიის დასკვნა, რომელიც კულტურისა და ძეგლთა დაცვის სამინისტროს მხრიდან საყდრისი-ყაჩაღიანისთვის ძეგლის სტატუსის ბათილად ცნობის საფუძველი გახდა არ წარმოადგენდა სავალდებულოდ გასათვალისწინებელი ხასიათის დოკუმენტს. შესაბამისად, სამინისტროს თავისუფლად შეეძლო კომისიის მიერ წარმოდგენილ დასკვნაში ასახული მტკიცებულებების მართებულობა კომპეტენციის ფარგლებში გადაემოწმებინა, როგორც სამინისტროში არსებული კულტურული მემკვიდრეობის დაცვის საბჭოს საშუალებით, ასევე უშუალოდ ქართულ-გერმანული არქეოლოგიური ექსპედიციის წევრებთან, თუმცა კომისიის დასკვნის გადამოწმება არ მოხერხდა. როგორც კულტურის მინისტრის ყოფილმა მოადგილემ, მარინე მიზანდარმა განაცხადა, დღევანდელი კვლევა საკმაოდ მნიშვნელოვანია. მისივე განმრატებით, ყველა მოქალაქისთვის, ვისაც გული შესტკივა კულტურულ მემკვიდრეობასთან დაკავშირებით, ეს კვლევა ძალიან სიღრმისეულია.
“ეს ნაშრომი მნიშვნელოვანია საყდრისი-ყაჩაღიანის ტერიტორიაზე წიაღისეულის მოპოვებასთან დაკავშირებით ლიცენზიის უფლებების გაცემის საკითხზე თუ როგორ იყო ეს გაკეთებული ამ წლების მანძილზე და რის საფუძველზე უგრძელდებოდა კერძო საწარმოს ლიცენზია სახელმწიფოს მიერ. ეს კვლევა წარმოაჩენს უამრავ დაფარულ ფაქტს და ძალიან ბევრ კითხვას ბადებს ყოველ მოქალაქეში”, – განაცხადა მარინე მიზანდარმა. მისივე განცხადებით, ყველა იმ უწყებამ, რომელიც ვალდებულია, პასუხი უნდა გასცეს საყდრისი-ყაჩაღიანის ირგვლივ დასმულ კითხვებს.
10.06.14
