ცესკო-ს 12:00 საათის მონაცემებით, არჩევნებში 571 123 ამომრჩეველმა მიიღო მონაწილეობა, რაც ამომრჩეველთა საერთო რაოდენობის 16,65%-ია.
ამის შესახებ ცესკო-ს სპიკერმა, ეკა აზარაშვილმა საინფორმაციო ბრიფინგზე განაცხადა. მისივე თქმით, 2013 წლის საპრეზიდენტო არჩევნებზე 12:00 საათისთვის ამომრჩეველთა აქტივობა 17,15% იყო.
“გვინდა განმარტება გავაკეთოთ ამომრჩეველთა სიასთან დაკავშირებით. ჩვენ 9 ივნისს გამოვაცხადეთ ამომრჩეველთა საერთო რაოდენობა და აღვნიშნეთ, რომ პირველი მაისის მონაცემებთან შედარებით ამომრჩეველთა სია შემცირდა 43 024-ით. ცესკო-მ ასევე განაცხადა, რომ მოქალაქეები, რომლებსაც არ გააჩნდათ იურიდიული ძალის მქონე პირადობის მოწმობა ან პასპორტი, ვერ მიიღებდნენ კენჭისყრაში მონაწილეობას, თუ დროულად არ აიღებდნენ პირადობის დამადასტურებელ ერთ-ერთ დოკუმენტს მაინც. შესაბამისად, იმ მოქალაქეების მონაცემები, რომლებმაც აღნიშნული პროცედურა ვერ გაიარეს, ცესკო-ს იუსტიციის სამინისტროს მიერ არ გადმოსცემია”, – განაცხადა ეკა აზარაშვილმა.
აზარაშვილი უარყოფს ინფორმაციას, რომ ბოლნისის #20 უბანში, ენის პრობლემის გამო, ერთდროულად საარჩევნო კაბინაში ორი ამომრჩეველი შევიდა.
“ამ უბნისთვის დაბეჭდილია ორენოვანი ქართულ-აზერბაიჯანული ბიულეტენი და კაბინაში ერთდროულად ორი ადამიანი შევიდა მხოლოდ კანონით დადგენილ შემთხვევაში. კანონი ითვალისწინებს, რომ საჭიროების შემთხვევაში ამომრჩეველს შეუძლია მოითხოვოს უბანზე მყოფი სხვა ადამიანის დახმარება ხმის მიცემისას”, – განაცხადა ეკა აზარაშვილმა.
მისივე თქმით, განახლებული ინფორმაცია ამომრჩევლეთა აქტივობის შესახებ 15:30 საათზე გახდება ცნობილი.
15.06.14
