„შოკოლაბი“ – ეს არის კომპანია იმ ადამიანებისთვის, რომლებისთვისაც ხარისხიანი და გემრიელი შოკოლადი განსაკუთრებული მნიშვნელობისაა. ისტორია არცთუ ისე დიდი ხნის წინ, კოვიდპანდემიის გამოცხადებამდე დაიწყო. გარკვეული პაუზის შემდგომ, შოკოლადის ეს სამყარო კვლავ ხელმისაწვდომი გახდა შოკოლადის მოყვარულთათვის.
მარიამ ედილაშვილი „შოკოლაბის“ დამფუძნებელია. „თბილისი თაიმსს“ სწორედ ის ესაუბრა.
„შოკოლაბი“ დაიბადა 2018 წლის 21 სექტემბერს, მას შემდეგ აქტიურად ვიყავით ჩართული საქმიანობაში, სანამ კოვიდის გამო არ მოხდა ობიექტების დაკეტვა და იზოლაცია. ამ დროს ცოტა შევშინდი და შევაჩერე წარმოება, თუმცა, 2022 წლის სექტემბრიდან ისევ განვაახლე საყვარელი საქმიანობა.
ვამზადებ ხელნაკეთ შოკოლადს, უმაღლესი ხარისხის ბელგიური და იტალიური ნედლეულით, აქტიურად ვმუშაობთ საბავშვო ხაზით. ვამზადებთ ფილებს, ბონბონებს, ტრუფელებს, მენდიანტებს და სხვადასხვა საინტერესო ფიგურას“.
როგორც მარიამი აღნიშნავს, კომპანია სრულად არის მორგებული მომხმარებლის სურვილებსა და გემოვნებაზე, შესაბამისად, სასაჩუქრე ყუთის აწყობისას სრულად ხდება მათი ინტერესების გათვალისწინება.
„ვფიქრობ, ჩვენი შოკოლადი გამორჩეული იმით არის, რომ ყოველთვის ახალია, არის ნამდვილად კარგი ხარისხის შოკოლადი. ვისაც შოკოლადი უყვარს, დამეთანხმება, რომ კარგი ხარისხის, გემრიელი შოკოლადი დიდი ფუფუნებაა. თვითონ კომპანია იმითაა გამორჩეული, რომ სრულიად მომხმარებელზეა მორგებული და მომხმარებლის ყველა მოთხოვნის გათვალისწინებით ხდება სასაჩუქრე ყუთის აწყობა“.
„შოკოლაბის“ დამფუძნებელი ხაზს უსვამს, რომ ამ ეტაპზე კომპანია მხოლოდ თბილისში, ონლაინ მუშაობს, თუმცა, პროდუქცია ქვეყნის სხვა ქალაქებშიც აქტიურად იგზავნება.
„ჯერჯერობით თბილისში, მხოლოდ ონლაინ ვმუშაობთ, ვაგზავნით ნებისმიერ რეგიონში. ჩვენი პროდუქცია იყიდება ქუთაისში, ქარვასლაში, მაღაზია Coffee friends since 2019- ში. შოკოლადი ჯერ სხვა ქვეყნებში არ გაგვაქვს, თუმცა, როგორც კი შესაძლებლობა იქნება, ამაზეც ვიფიქრებთ“.
