“ერთიანი ნაციონალური მოძრაობა” ცენტრალურ საარჩევნო კომისიას ადგილობრივი თვითმმართველობის არჩევნების მეორე ტურის თარიღის გამოცხადებისკენ მოუწოდებს.
როგორც დღეს გამართულ ბრიფინგზე თბილისის უფლებაშეჩერებულმა მერმა, გიგი უგულავამ განაცხადა, “ერთიან ნაციონალურ მოძრაობას” აქვს სრულიად ლოგიკური და ლეგიტიმური მოთხოვნა ცენტრალური საარჩევნიო კომისიის მიმართ, უმოკლეს ვადებში დაასახელოს არჩევნების მეორე ტურის თარიღი.
უგულავას თქმით, ამას პრინციპული მნიშვნელობა აქვს, ეს არ არის მხოლოდ თარიღის ცოდნა და მხოლოდ ის, რომ მეორე ტურში გასული სუბიექტები უნდა მოემზადონ განმეორებითი არჩევნებისთვის.
“ჩვენი ინფორმაციით, მთავრობამ მოახდინა ზეწოლა თამარ ჟვანიაზე. მთავრობის მოთხოვნა იყო 12 ივლისი, რაც აბსოლუტურად ეწინააღმდეგება იმ წესებს და პროცედურებს, რომლებიც არსებობს. მოგეხსენებათ, ძალიან ბევრ სუბიექტს შედეგები გასაჩივრებული აქვს სასამართლოში და მიმდინარეობს ხელახალი გადათვლები; შესაბამისად შეუძლებელია, 19 ივლისამდე ადრე ცენტრალურმა საარჩევნო კომისიამ დანიშნოს არჩევნების მეორე ტური”, – აღნიშნა უგულავამ.
მისი თქმით, ამ თარიღის ცოდნას აქვს პრინციპული მნიშვნელობა, ვინაიდან სწორედ გამოცხადებიდან ყველა მონაწილე კვალიფიციურ სუბიექტს ექნება უფასო საეთერო დროით სარგებლობის შესაძლებლობა, რა შესაძლებოლობასაც ამ მომენტისთვის სუბიექტები ბიუროკრატიული, საკანონმდებლო ხარვეზების, თუ ცენტრალური საარჩევნო კომისიისა და კონკრეტულად მისი თავმჯდომარის მოუქნელი მუშაობის გამო ამ მნიშვნელოვან ინსტრუმენტს წინასაარჩევნო პერიოდში მოკლებულნი არიან.
უგულავას აზრით, ასევე ძალიან მნიშვნელოვანია თარიღის ცოდნა იმისთვის, რომ პოლიტიკურმა სუბიექტებმა დაგეგმონ წინასაარჩევნო კამპანია.
როგორც უგულავამ განაცხადა, ხელისუფლება ყველანაირად ცდილობს წარმოაჩინოს, თითქოს არაფერი ხდება, მეორე ტური არაფერია და გამარჯვება უკვე ნაზეიმარი აქვს.
“შეუძლებელია, 12 ან 15 ივლისს იყოს მეორე ტური. მოვითხოვთ კატეგორიულად, დღეს ან ხვალ გამოცხადდეს არჩევნების თარიღი, წინააღმდეგ შემთხვევაში სახეზე იქნება სამწუხარო გარიგება მთავრობასა და ცესკო-ს შორის”, – დასძინა უგულავამ.
23.06.14
