ბოლო დღეების ერთერთ მთავარ სოციალურ პრობლემას საწვავზე ფასების ზრდა წარმოადგენს. ბენზინის ფასი, საშუალოდ, 3-5 თეთრით არის გაზრდილი. აღნიშნულის მიზეზს საერთაშორისო ბაზარზე ნავთობპროდუქტების ფასების ზრდა წარმოადგენს. თუმცა, ცალკე საკითხია, როგორ აისახება მოქალაქეებზე ბენზინგასამართ სადგურებში უკვე დაფიქსირებული მაღალი ფასები.
სოციალურ ქსელებს რომ თვალი გადავავლოთ, ვნახავთ, რომ, რამდენიმე მიზეზის გამო, ხსენებული ცვლილება მოსახლეობისთვის ძალიან უსიამოვნოა. აღნიშნავენ, რომ, განსაკუთრებით – კივიდპანდემიის პერიოდში, ეს გადაწყვეტილება მხოლოდ ზიანის მომტანია ოჯახებისთვის.
„ვიცით, გლობალური და ეკონომიკური მიზეზებით ხდება ამ ყველაფრის ახსნა, მაგრამ მაშინ მოქალაქეების ანაზღაურებაც ხომ უნდა შეესაბამებოდეს ცვლილებებს? მოიმატოს ჩვენმა ხელფასებმა, ელემენტარული მოთხოვნილებები რომ უზრუნველვყოთ. ახლა, მით უმეტეს, როდესაც კორონავირუსია სამყაროში, ხომ უნდა შევძლოთ თითოეულმა ადამიანმა, თავი დავაღწიოს და ვიარსებოთ მაინც? საწვავის ფასი ზრდა მხოლოდ ჩვენზე, რიგით მოქალაქეებზე აისახება დამღუპველადაც კი“, – ამბობს „თბილისი თაიმსთან“ საუბრისას მოქალაქე, გიორგი ახვლედიანი.
„რთული და წარმოუდგენელია, იფიქრო მსოფლიო ეკონომიკურ და მსგავს საკითხებზე, როდესაც ყოველი ანაზღაურების შემდეგ გაქვს გაწერილი, რაში რამდენს დახარჯავ. ელემენტარულად, ჰო უნდა შეგეძლოს ადამიანს, მშვიდად გადააადგილდე? იმის ნაცვლად, პანდემიის დროს ადამიანებს ხელი გვეწყობოდეს, ყოველდღიური საჭიროება გვეზღუდება ამ ფაქტით. მე არ ვიცი, რა მიზეზები დგას საწვავის ფასის ზრდის უკან, მაგრამ, სიმართლე გითხრათ, ამაზე ფიქრი არც შემიძლია და არც სურვილი მაქვს“, – ამბობს გიორგი გიგაური ჩვენთან საუბრისას.
მასალა მოამზადა : მარიამ ტიელიძემ
