ხელისუფლებამ დაამტკიცა, რომ ყველა საქმეს მაქსიმალურად დემოკრატიულად უდგება, – ამის შესახებ რუსთავის მერის არჩევნებში გამარჯვებულმა “ქართული ოცნების” მერობის კანდიდატმა დავით ჯიქიამ განაცხადა. მან რუსთაველ ამომრჩეველს აქტიურობისა და მხარდაჭერისათვის მადლობა გადაუხადა.
წინასწარი შედეგების მიხედვით “ქართული ოცნების” რუსთავის მერობის კანდიდატს მხარი არჩევნებზე მისული ამომრჩევლის 64.55%-მა დაუჭირა, მის კონკურენტს, “ერთიანი ნაციონალური მოძრაობის” კანდიდატ მამუკა ჩიქოვანს კი – 35.45%-მა.
“ძალიან დიდი მადლობა მინდა ვუთხრა ჩვენს ამომრჩეველს აქტივობისა და მხარდაჭერისთვის. მინდა მადლობა ვუთხრა იმ 35%-საც რომელმაც მე არ დამიჭირა მხარი, მაგრამ მოვიდა არჩევნებზე. თითოეულმა მოქალაქემ გააკეთა საკუთარი არჩევანი, არჩევანი იმისა, თუ რა გზით უნდა წავიდეს რუსთავი და როგორ უნდა განვითარდეს. მინდა ამისათვის მადლობა ვუთხრა ჩემს რუსთაველებს. არჩევნები საკმაოდ მშვიდ გარემოში მიმდინარეობდა თუ არ ჩავთვლით მცირე ინციდენტს. ამით ხელისუფლებამ დაამტკიცა ის, რომ ყველა საქმეს მაქსიმალურად დემოკრატიულად უდგება. ორშაბათიდან შევუდგები მუშაობას, მიუხედავად იმისა, რომ რამდენიმე დღიანი პროცედურები იქნება გასავლელი. როგორც მერის მოვალეობის შემსრულებელი შვებულებაში ვიყავი, ორშაბათიდან მზად ვარ ჩემი ქალაქის სამსახურში ჩავდგე”, – განაცხადა დავით ჯიქიამ.
13.07.14