ევროპულმა საბჭომ (ევროკავშირის უმაღლესი ორგანო, საბჭო ევროკავშირის ქვეყნების პირველი პირებისაგან შედგება) ევროკომისიას რუსეთთან თანამშრომლობის ყველა პროგრამის შეჩერება დაავალა. გამონაკლისს ტრანსსასაზღვრო და სამოქალაქო საზოგადოების პროგრამები წარმოადგენს.
შესაბამისი მუხლი ჩაიწერა უკრაინის კრიზისთან დაკავშირებით გაკეთებულ შემაჯამებელ განცხადებაში.
„ევროპული საბჭო ავალებს ევროკომისიას გადახედოს რუსეთთან თანამშრომლობის ყველა ორმხრივ და რეგიონალურ პროგრამას, რათა ყველა პროგრამის შეჩერებასთან დაკავშირებით დამოუკიდებლად მიიღოს გადაწყვეტილება“ – ნათქვამია დოკუმენტში. მასში აღნიშნულია, რომ „მხოლოდ ტრანსსასაზღვრო და სამოქალაქო საზოგადოების პროექტები შენარჩუნდება“.
უკრაინის პრეზიდენტმა პეტრო პოროშენკომ ევროპულ საბჭოს მადლობა ფეისბუქით გადაუხადა. „ევროპულმა საბჭომ უკრაინის ტერიტორიული მთლიანობისა და სამოუკიდებლობის მხარდასაჭერად მნიშვნელოვანი ნაბიჯი გადადგა. ჩვენმა მუდმივმა დიალოგმა შედეგი გამოიღო“ – წერს პოროშენკო.
უკრაინის კრიზისთან დაკავშირებით, რუსეთის წინააღმდეგ სანქციები ამერიკელებმაც გაამკაცრეს.
აშშ-ის ფინანსთა სამინისტროს განცხადებით, სანქციები გამკაცრდა რუსული კომპანიებისა და ჩინოვნიკების წინააღმდეგ. კერძოდ, შავ სიაში მოხვდნენ დუმის ვიცესპიკერი სერგეი ნევეროვი, ყირიმის საქმეთა მინისტრი ოლეგ საველიევი, პუტინის თანაშემწე იგორ შეგოლევი. ამერიკულ „შავ სიაში“ ასევე აღმოჩდნენ ლუგანსკისა და დონეცკის თითმარქვია „სახალხო რესპუბლიკების“ ლიდერები.
სანქციები დაუწესდა რუსეთის სამხედრო სამრეწველო კომპლექსში შემავალ საწარმოებს მათ შორის „ალმაზ ანტეის“, კონცერნ „კალაშნიკოვს“, „ბაზალტს“, „იჟმაშს“, „ურალვაგოზავოდს“, „სოზვეზდიეს“, რედიოელექტროუნული ტექნოლოგიების კონცერნს და სხვა.
შავ სიაში ასევე აღმოჩნდნენ რუსული ნავთობკომპანიები და ბანკები: „ნოვოტეკი“, „როსნეფტი“, „ვნეშეკონომბანკი“ და „გაზპრომბანკი“.
17.07.14
