სტუდენტები მოსახლეობის საყოველთაო აღწერის პროექტში ჩაერთვებიან. როგორც დღეს გამართულ პრესკონფერენციაზე განათლების მინისტრის მოადგილე გიორგი შარვაძემ განაცხადა, საქართველოს განათლებისა და მეცნიერების სამინისტროსა და საქართველოს სტატისტიკის ეროვნულ სამსახურს შორის გაფორმდა ურთიერთთანამშრომლობის მემორანდუმი, რის შედეგადაც მოსახლეობის საყოველთაო აღწერის პროექტში სტუდენტებიც ჩაერთვებიან.
მისი თქმით, საინფორმაციო შეხვედრები საქართველოს ყველა იმ ქალაქებში ჩატარდა, სადაც უმაღლესი საგანმანათლებლებლო დაწესებულება ფუნქციონირებს.
“გარდა იმისა, რომ სტუდენტებს მიეცემათ საშუალება აღწერაში მიიღონ მონაწილეობა, მათთვის ეს იქნება ერთგვარი პრაქტიკა. მასში მონაწილეობას მიიღებენ, როგორც სოციოლოგები, ასევე მომიჯნავე სპეციალობის სტუნდეტები. ეს არის კარგი შანსი მათთვის, როგორც მომავალი სპეციალისტებისთვის. მომავალი სოციოლოგებისთვის ეს პროცესი დაიწყება შემოდგომაზე”, – განაცხადა გიორგი შარვაშიძემ.
განათლების მინისტრის მრჩეველის ოთარ აბესაძის განცხადებით კი, პროგრამაში 1680 სტუდენტი ჩაერთვება.
“აღნიშნულ პროექტში სტუდენტები ერთვებიან შემდეგი პრინციპით: მემორანდუმის შინაარსიდან გამომდინარე, უნივერსიტეტის ფაკულტეტებმა აიღეს ვალდებულება, რომ თითოეული ფაკულტეტიდან გაეწიათ მაღალი მოსწრების და მაღალი შეფასების მქონე სტუდენტებისთვის რეკომენდაცია. თითეულ რეკომენდირებულ სტუდენტს აქვს ფაკულტეტის დეკანის რეკომენდაცია. 31 ივლისის ჩათვლით კი, უნივერსიტეტები მოგვაწვდიან რეკომენდირებულ სტუდენტთა სიას. ეს სია გადაეცემა “საქსტსტს” და მოხდება მათი ამ პროექტში დასაქმება”, – განაცხადა აბესაძემ.
მისივე თქმით, დასაქმება 5-დან 19 ნომბრის ჩათვლით მოხდება, ხოლო მოსამზადებელი ტრენინგები 23 ოქტომბრიდან 1 ოქტომბრის ჩათვლით ჩატარდება.
“ამ პერიოდის განმავლობაში სტუნდეტებს მოუწევთ სრული სამუშაო გრაფიკით დატვირთვა. დღეში 8 საათი მოუწევთ მუშაობა. ერთ აღმწერს, ანუ ერთ სტუდენტს 2 კვირის განმავლობაში აღსაწერი ექნება 120 ოჯახი. ამ პერიოდში უნივერსიტეტებში მათ გაცდენები ჩაეთვლებათ საპატიოდ”, – აცხადებს აბესაძე.
მისი თქმით, სტუდენტები ანაზღაურების სახით 400-500 ლარს აიღებენ.
25.07.14
