“დარწმუნებული ვარ, რომ საქართველო-გერმანიის ისტორიული მეგობრობა და თანამშრომლობა კიდევ უფრო გაღრმავდება”

საქართველოს პრეზიდენტმა გიორგი მარგველაშვილმა გერმანიის გაერთიანების დღესთან დაკავშირებით კანცლერ ანგელა მერკელს მისალოცი წერილი გაუგზავნა. “25 წლის წინ დაინგრა ათწლეულების განმავლობაში აღმოსავლეთისა და დასავლეთის კონფრონტაციის სიმბოლო – ბერლინის კედელი. ბერლინის კედლის დაცემამ ბიძგი მისცა სიღრმისეულ ცვლილებებს მთელ მსოფლიოში, ეს იყო ევროპის დანაწილებისა და ცივი ომის დასასრული. მსურს, გამოვიყენო შესაძლებლობა და ქართველი ხალხისა და პირადად, ჩემი სახელით გამოვხატო მადლიერება საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის. დარწმუნებული ვარ, რომ საქართველო-გერმანიის ისტორიული მეგობრობა და თანამშრომლობა კიდევ უფრო გაღრმავდება ჩვენი ერების საკეთილდღეოდ”, – ნათქვამია გიორგი მარგველაშვილის მისალოც წერილში. საქართველოს პრეზიდენტი ანგელა მერკელს საპასუხისმგებლო საქმიანობაში – წარმატებას, ხოლო გერმანელ ხალხს მშვიდობასა და კეთილდღეობას უსურვებს. 03.10.14