საკრებულოს თავმჯდომარის მოადგილის გარდა, ვანში ქრთამის აღების ფაქტზე, კიდევ ორი ყოფილი თანამდებობის პირი დააკავეს. დაკავებულებს ბრალის დამტკიცების შემთხვევაში, 9 წლით თავისუფლების აღკვეთა ემუქრებათ. ამასთან დაკავშირებით ფინანსთა სამინისტროს საგამოძიებო სამსახური განცხადებას ავრცელებს.
როგორც განცხადებაშია აღნიშნული, ფინანსთა სამინისტროს საგამოძიებო სამსახურმა, ვანის მუნიციპალიტეტის საკრებულოს თავმჯდომარის მოადგილე კობა ძაგნიძე ქრთამის აღების ფაქტზე დააკავა.
გამოძიებით დადგენილია, რომ კობა ძაგნიძემ, ვანის მუნიციპალიტეტის მიერ გამოცხადებულ ელექტრონულ ტენდერში მონაწილე ერთ-ერთი კომპანიის წარმომადგენელს გამარჯვების და შემდგომში მფარველობის სანაცვლოდ, სატენდერო ღირებულების 25% მოსთხოვა. დაკავებულმა აღნიშნული კომპანიის წარმომადგენელს ტენდერში გამარჯვების შემდგომ, ქრთამის სახით, 3 000 ლარი გამოართვა.
საგამოძიებო სამსახურმა ასევე დააკავა ვანის მუნიციპალიტეტის გამგეობის ინფრასტრუქტურის ყოფილი უფროსი ავთანდილ ჭელიძე და ვანის რაიონის სოფ. ამაღლების ტერიტორიული ორგანოს ყოფილი რწმუნებული მამია გაბუნია.
საგამოძიებო სამსახურის ცნობით, დაკავებულებმა ერთ-ერთი კომპანიის წარმომადგენელს ტენდერში გამარჯვების შემდეგ, შესრულებული სამუშაოების დაუბრკოლებლად ჩაბარების სანაცვლოდ, ქრთამის სახით, 7 000 ლარი გამოართვეს.
გამოძიება მიმდინარეობს საქართველოს სისხლის სამართლის კოდექსის 338-ე მუხლის პირველი ნაწილით, რაც სასჯელის სახiთ და ზომად ითვალისწინებს თავისუფლების აღკვეთას 9 წლამდე ვადით.
24.10.14