საქართველოში ბოლო პერიოდში განსაკუთრებით გაიზარდა ხელნაკეთი ნივთების რაოდენობა. მიუხედავად მათი სიმრავლისა, დიზაინერები იდეების ნაკლებობას არ უჩივიან. ყოველი მათგანი განსხავავებული და გამორჩეულია სხვებისგან. თუმცა ახალი ქართული წამოწყება სრულიად განსხვავდება ყველასგან. Pepela Wooden Bow Ties ბაფთებს ხისგან ამზადებს. შესაძლოა უცნაურად მოგეჩვენოთ, თუ რამდენად მოსახერხებელია და სასიამოვნოა მათი ტარება. თუმცა, თუ ერთხელ მაინც შეავლებთ ახლოდან თვალს, მიხვდებით, რომ განსხვავებულობასათან ერთად, ხის ბაფთები საკმოად მსუბუქი, კარგად დამუშავებულია და გამოსაყენებლადაც მოსახერხებელი.
Pepela Wooden Bow Ties -ის სახელი და ისტორია დაკავშირებულია ვანო ხარაშვილთან, რომელმაც ხის ბაფთების კეთება ამერიკაში ყოფნისას დაიწო. „თბილისი თაიმსი“ მოგიყვებათ თუ როგორ აქცია მან იდეა, საყვარელ საქმიანობად და წარმატებულ ბიზნესად.
მოგვიყევით თქვენზე, როგორ გაგიჩნდათ იდეა შეგექმათ ხის ბაფთები?
– დიდი ხანია მქონდა იდეა შემექმნა რაღაც განსხვავებული ნივთი, რომელიც არ იქნებოდა ბაზარზე. გარკვეული დრო ამერიკის შეერთებულ შტატებში ვცხოვრობდი, და ვმუშაობდი ხის სახელოსნოში. გადავწყვიტე, რომ ეს საუკეთესო შესაძლებლობა იქნებოდა, დამეწყო ის საქმე, რაც ძალიან დიდი ხანია მინდოდა. ჩემი იდეის შესახებ სახელოსნოს უფროს მოვუყევი. მართალია, თავიდან დიდად არ მოეწონა ეს იდეა, თუმცა გადავწყვიტეთ გვეცადე. პირველივე ბაფთა ძალიან კარგი გამოვიდა. დღემდე ვინახავ, ძალიან მიყვარს, გამორჩეული და ჩემთვის ძალიან საყვარელია. პირველი კოლექცია 4 ივლისს გავიტანე ამერიკის დამოუკიდებლობის დღეზე. სწორედ აქედან დავიწყე აქტიური მუშაობდა ბაფთებზე.
როდის დაიწყეთ ხის ბაფთების საქართველოში კეთება?
– ძალიან მინდოდა, რომ საქართველოშიც მეცადა მათი კეთება. სიმართლე გითხრათ, ცოტა გაკვირვებული დავრჩი იმდენად მოეწონათ ჩემი ბაფთები და იმხელა გამოხმაურება მოჰყვა. ძალიან მალე გაიგეს მათ შესახებ, მეგობრებიდან და ახლობლებიდან, რომლებიც ჩემ მიერ დამზადებულ ბაფთებს ატარებდნენ. ასევე ფეისბუკ გვერდიდან. ძალიან მიხარია, რომ დღეს ჩვენს ქვეყანაშიც აფასებენ ხელნაკეთ ნივთბს და დიდ ყურადღებას აქცევენ.
რა მასალას იყენებთ ბაფთების შესაქმნელად?
– ჩემი ბაფთები დამზადებულია ხისგან და დამუშავებულია ცვილით. ყველაფერი ნატურალური და ჯანსაღია. გამოიყენება მხოლოდ უმაღლესი ხარისხის ქსოვილები, როგორიცაა: აბრეშუმი, ატლასი და ბამბა. ძალიან კარგი საჩუქარია, როგორც მამაკაცებისთვის, ასევე, ქალბატონებისთვის. ასევე მოსახერხებელია მათი ტარება. ორიგინალურია და გამოგარჩევს სხვებისგან.
როგორია კონკურენცია და რამდენად მოთხოვნადია ხის ბაფთები ქართულ ბაზარზე?
– ჩემი ხის ბაფთების გარდა, კიდევ რამდენიმე კომპანია აკეთებს მსგავს დიზაინებს. თუმცა ყოველ მათგანს რაღაც გამოარჩევს სხვებისგან. ჩემი ნამუშევრები მხოლოდ ნატურალური მასალისგან მზადდება. ყოველთვის ვცდილობ ყოველი დეტალი საუკეთესო იყოს. ჯერჯერობით დიდი რაოდენობის ბაფთებს ვერ ვაკეთებ, რადგან დროც არ მაქვს და თანაც არ მინდა რაოდენობის ხარჯზე ხარისხი შემცირდეს.
სად შეიძლება ხის ბაფთების შეძენა?
– გარდა ფეისბუკ გვერდისა, მათი შეძენა შესაძლებელია თბილისის სამ მაღაზიაში და ასევე სამ ონლაინ მაღაზიაშიც. ცოტა ხნის წინ ჩემი მეგობარი დამიკავშირდა და მითხრა, რომ აკეთებდა ონლაინ მაღაზიას, სადაც იქნება ქართველი დიზაინერების მიერ შექმნილი ნივთები. მთხოვა, ჩემი ბაფთებიც გამეგზავნა. ეს სასიამოვნო შემოთავაზება იყო, ამიტომ გავაგზავნე მცირე კოლექცია და ახლა ვაპირებ შესაფუთი ხის ყუთებიც გავაგზავნო.
რითია გამორჩეული თქვენი ბაფთები?
– ყოველთვის ვცდილობ, რომ საუკეთესო ხარისხი იყოს. ამიტომ, ცოტათი მიჭირს კარგი მასალის პოვნა. ზოგიერთი მასალა ამერიკიდან ჩამომაქვს, თუმცა სულ ვცდილობ საქართველოში შევიძინო ყველაფერი. ძირითადად მარტო ვმუშაობ, რადგან ვფიქრობ, რომ სხვა ადამიანი ისე ხარისხიანად ვერ შექმნის, როგორიც მინდა რომ იყოს. მინდა, რომ ყოველი მათგანი განსხვავებული, გამორჩეული და საუკეთესო იყოს. ვცდილობ იდიალური ნამუშევარი შევქნა, სრულყოფილი. თითოეულ მათგანში მთელს სულსა და გულს ვდებ. დღემდე არც ერთი უკმაყოფილო მომხმარებელი არ მყოლია, მათგან მხოლოდ დადებითი ემოციები და სითბო მოდის.
როგორია თქვენი სამომავლო გეგმები?
– მე და ჩემს მეგობარს გვინდა, რომ ხის ბაფთებს დავამატოთ, ხის ბეჭდები, თმისამაგრები, „ბროშები“. დიდი შრომა სჭირდება ამ ყველაფერს, ამიტომ ვდილობთ ნელ-ნელა დავამტოთ სიახლეები, იმისთვის, რომ ბოლომდე შევინარჩუნოთ ის ხარისხი და სილამაზე, რაც გამოგვარჩევს.
მარიამ ლეკიაშვილი
