ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი მთავრობის ადმინისტრაციაში გერმანიის ბუნდესტაგის წევრს კარინს ტრენზს შეხვდა.
როგორც “თბილისი თაიმსს” ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატიდან აცნობეს, შეხვედრაზე საქართველო-ევროკავშირის ურთიერთობის აქტუალური საკითხები განიხილეს.
მათივე ინფორმაციით, შეხვედრაზე საქართველოს ვიზის ლიბერალიზაციის პირველი ფაზის წარმატებით დასრულებისა და მეორე ფაზის დროულად დაწყების მნიშვნელობაზე ისაუბრეს.
ალექსი პეტრიაშვილმა დაადასტურა საქართველოს მთავრობის მზაობა 2015 წელს დაგეგმილი “აღმოსავლეთ პარტნიორობის” რიგის სამიტამდე შეასრულოს ყველა ვალდებულება, რათა აღნიშნულ სამიტზე მიღებული იქნას გადაწყვეტილება საქართველოს მოქალაქეებისათვის ევროკავშირთან უვიზო მიმოსვლის შესახებ.
ამავდროულად, აღნიშნა სამიტზე ევროპულ პერსპექტივასთან დაკავშირებით გადაწყვეტილების მიღების მნიშვნელობაც, რაც იქნება ძლიერი გზავნილი, რომ საქართველოს ევროკავშირში ინტეგრაციის პროცესი ასოცირების შეთანხმების ხელმოწერით არ დასრულებულა. მხარეებმა ასოცირების შეთანხმების დღის წესრიგით გათვალისწინებული საკითხების აღსრულებაზე ისაუბრეს. სახელმწიფო მინისტრმა ხაზი გაუსვა ევროკავშირის წევრი ქვეყნების მიერ ასოცირების შეთანხმების რატიფიცირების დაჩქარების მნიშვნელობას.
შეხვედრაზე ყურადღება გამახვილდა საქართველოს ევროატლანტიკურ მისწრაფებებზე. განსაკუთრებით აღინიშნა ნატო-ს უელსის სამიტის გადაწყვეტილებების დროულად აღსრულების მნიშვნელობა და ხაზი გაესვა, რომ საქართველოს ნატო-ში გაწევრიანების პროცესში უფრო დიდი და ჩქარი ნაბიჯების გადადგმაა საჭირო.
შეხვედრაზე რეგიონში უსაფრთხოების კუთხით არსებული ვითარება განიხილეს. ალექსი პეტრიაშვილმა რუსეთის მიერ აფხაზეთის და ცხინვალის რეგიონის ანექსიის მცდელობაზე ისაუბრა. სახელმწიფო მინისტრმა გერმანიის აღმასრულებელ და საკანონმდებლო ხელისუფლებას, ნატო-ს, ევროკავშირსა და საერთაშორისო საზოგადოებას რუსეთის ქმედებების უმკაცრესად დაგმობისაკენ და მსგავსი ქმედებების აღსაკვეთად საერთაშორისო ზეწოლის გაგრძელებასა და გაძლიერებისკენ მოუწოდა. აღნიშნა, რომ რუსეთის აგრესიული პოლიტიკის ტენდენცია საფრთხეს უქმნის არა მხოლოდ საქართველოსა და უკრაინის, არამედ, რეგიონისა და სრულიად ევროპის უსაფრთხოებას.
“ჩვენ გვქონდა დეტალურად საუბარი რეგიონულ უსაფრთხოებაზე, გვქონდა საუბარი საქართველოს პერსპექტივებზე. გვაქვს იმედი, რომ გერმანია მხარს დაუჭერს საქართველოსთვის უვიზო მიმოსვლის საკითხს. ასევე, გვინდა, რომ ევროპული პერსპექტივაც მივიღოთ უახლოეს მომავალში და რაც მთავარია და ასევე, უაღრესად მნიშვნელოვანი უსაფრთხოების საკითხებში საქართველოსა და გერმანიას შორის კიდევ უფრო აქტიურად და ინტენსიურად მიმდინარეობს თანამშრომლობა და გერმანია მხარს დაუჭერს საქართველოს შეიარაღებული ძალების განვითარებას, რეფორმირებას და მოდერნიზებას”, – განაცხადა შეხვედრის დასრულების შემდეგ ალექსი პეტრიაშვილმა.
30.10.14
