სამართალდამცველებმა წარსულში თავისუფლების უკანონო აღკვეთისათვის ნასამართლევი ელმან გ. და წარსულში ყაჩაღობისთვის ნასამართლევი ანარ გ. დიდი ოდენობით ნარკოტიკული საშუალების უკანონო შეძენა-შენახვის და გასაღების ბრალდებით დააკავეს. ბრალდებულების დაკავება გარდაბნის რაიონის სოფელ ყარაჯალაში მოხდა.
შსს-ს ცნობით, ოპერატიული ინფორმაციის საფუძველზე ჩატარებული საგამოძიებო მოქმედებების დროს, სამართალდამცველების კანონიერ მოთხოვნას გაეჩერებინათ ავტომანქანა, მამა-შვილი – ელმან გ. და ანარ გ. არ დაემორჩილნენ. მათ პოლიციელებს წინააღმდეგობა გაუწიეს, არ გააჩერეს ავტომობილი და მიმალვა სცადეს, რა დროსაც პოლიციის თანამშრომლის მართვის ქვეშ მყოფ ავტომობილს შეეჯახნენ.
სამართალდამცველებმა დაკავებულების და ასევე მათი ნათესავის საცხოვრებელი სახლების ჩხრეკისას ნარკოტიკული საშუალება ჰეროინი ამოიღეს. გამოძიებამ დაადგინა, რომ ბრალდებულები ნარკოტიკული საშუალების რეალიზაციას სისტემატურად ახდენდნენ.
გამოძიება წინასწარი შეთანხმებით ჯგუფის მიერ დიდი ოდენობით ნარკოტიკული საშუალების უკანონო შეძენა-შენახვისა და გასაღების, სხვისი ნივთის
დაზიანების და ჯგუფის მიერ პოლიციელის მიმართ წინააღმდეგობის გაწევის ფაქტებზე მიმდინარეობს საქართველოს სსკ-ის 260-ე მუხლის მე-2 ნაწილის “ა” და “ბ” ქვეპუნქტებით, 353-ე მუხლის მე-2 ნაწილით და 187-ე მუხლის 1-ლი ნაწილით.
04.12.14
