არც რუბლის სტაბილურობას არ გაამყარებს ცხინვალთან დადებული ხელშეკრულება და არც ნავთობის ფასს არ გაზრდის, – ასე გამოეხმაურა საქართველოს პრეზიდენტი გიორგი მარგველაშვილი ოკუპირებული ცხინვალის ე.წ. პრეზიდენტის ლეონიდ თიბილოვის განცხადებას, რომლის მიხედვითაც რუსეთსა და ე.წ. სამხრეთ ოსეთს შორის მოკავშირეობისა და პარტნიორობის შესახებ ე.წ. შეთანხმებასთან დაკავშირებით აქტიური მუშაობა მიმდინარეობს.
როგორც გიორგი მარგველაშვილმა განაცხადა, ის განცხადებები რაც თიბილოვმა გააკეთა, სრულიად მიუღებელია.
“ჩვენ ამის თაობაზე ვიცოდით და თავიდანვე, როდესაც დავიწყეთ საუბარი იმ პრობლემებზე რაც იყო, აფხაზეთთან ხელშეკრულების თაობაზე, ამაზეც გავაკეთეთ აქცენტი, რომ იგივე მოსალოდნელი იყო, სამწუხაროდ, ცხინვალის რეგიონთან”, – განაცხადა გიორგი მარგველაშვილმა.
მისივე თქმით, ქართულმა მხარემ გააქტიურა მუშაობა საერთაშორისო მიმართულებით და მიიღო კიდევაც მხარდაჭერა.
“საერთაშორისო თანამეგობრობამ იცის აფხაზეთის პრობლემების პარალალურად იგივე პრობლემა, რომ გაჩნდებოდა ცხინვალშიც. კიდევ ერთ რამეს მინდა გავუსვა ხაზი, არც რუბლის სტაბილურობას არ გაამყარებს ცხინვალთან დადებული ხელშეკრულება და არც ნავთობის ფასს არ გაზრდის. ეს პრობლემები არ გვარდება ცხინვალთან ხელშეკრულების გაფორმებით. პრობლემები, რომელიც წყდება საქართველოსთან დიალოგის, კონსტრუქციული თანამშრომლობის ფორმით, ამაშია მომავალი როგორც საქართველოსი, ასევე რუსეთის, ასევე აფხაზების და ოსების”, – განაცხადა საქართველოს პრეზიდენტმა.
11.12.14
