საქართველოს სოფლის მეურნეობის სამინისტროს განმარტებით, მედიაში გავრცელებული ინფორმაცია, რომლის თანახმადაც ახალი წლიდან რუსეთში ქართული ხილისა და ბოსტნეულის შეტანა იკრძალება, სიმართლეს არ შეესაბამება.
ამის შესახებ ნათქვამია სოფლის მეურნეობის სამინისტროს მიერ გავრცელებულ განცხადებაში.
“რუსეთის ბაზარაზე ქართული პროდუქციის ექსპორტი 2013 წლიდან განახლდა. პირველ ეტაპზე რუსეთის ბაზარზე დაბალი ფიტოსანინიტარიული რისკის, მოგვიანებით კი, მაღალი ფიტოსანიტარიული რისკის შემცველი პროდუქცია დაიშვა. ამ ეტაპზე საქართველოდან რუსეთში ალკოჰოლური და მინერალური სასმელების, ასევე ბოსტნეულის, ხილის, ციტრუსის, მშრალი ხილის, სუნელების, ჩაის და დაფნის ექსპორტი ხორციელდება.
მიმდინარეობს მოლაპარაკებები ცხოველური წარმოშობის პროდუქციის, ცხვრის, თევზისა და თაფლის ექპორტის განსახორციელებლად”, – ნათქვამია განცახდებაში.
მედიაში გავრცელდა ინფორმაცია, რომლის მიხედვით, ახალი წლიდან რუსეთში შესაძლოა ქართული ხილ-ბოსტნეულის შეტანა აიკრძალოს. რუსული მედიის ინფორმაციით, აღნიშნულ გადაწყვეტილებას პრეზიდენტმა პუტინმა ხელი ჯერ კიდევ აგვისტოში მოაწერა და ამის მიზეზად საკარანტინო პირობები დაასახელა. მოსკოვის მორიგ “ემბარგოსთან” დაკავშირებით ოფიციალური თბილისის ოფიციალური პასუხი ჯერჯერობით უცნობია.
2015 წლის პირველი იანვრიდან რუსეთის ფედერაციაში სხვადასხვა ქვეყნიდან პროდუქტის შეტანის წესებში ცვლილებები შევა, რომლის ძირითად კარანტინს დაექვემდებარება ხილი, ბოსტნეული (როგორც ნედლი, ისე გამხმარი ან ჩირის სახით), მწვანილი, სუნელები, თხილი, ჩაი და სხვა მსგავსი პროდუქცია, მათ შორის ყვავილები. ჩამოთვლილი სახეობების შეტანა ევროკავშირისა და ყოფილი საბჭოთა კავშირის რამდენიმე ქვეყნიდან აიკრძალება, მათ შორის, საქართველოდან, უკრაინიდან, მოლდოვადან, აზერბაიჯანიდან, უზბეკეთიდან და ტაჯიკეთიდან.
29.12.14
