ერთმა მორწმუნემ გაბრიელ ბერს შეეკითხა: “მამა გაბრიელ, მხოლოდ გზის ფული რომ მაქვს, მათხოვარს მივცე თუ არა?”
“რას ამბობ, სახარებაში წერია – ორი სამოსი რომ გაქვს, ერთი გაეცი; ის კი არ წერია, ერთი რომ გაქვს, ისიც მიეციო. ფული რომ მისცე და გზაში რაიმე დაგემართოს, შენ იქნები უფლის წინაშე პასუხისმგებელი. ეს ბერების საქმეა და ერის ხალხს არ ეხება” – უპასუხა ბერმა.
***
გაბრიელ ბერის წინასწარმეტყველება არაერთხელ გექნებათ წაკითხული, მაგრამ ყოველ ჯერზე შესაძლოა რაღაც ახალი მაინც აღმოაჩინოთ მასში.
90-იან წლებში, როცა ბერი ამ ყველაფერს წინასწარმეტყველებდა, შტრიხკოდიანი პროდუქტი საერთოდ წარმოსახვაშიც კი არ ექნებოდა ვინმეს. მაგრამ აბა, ნახეთ, რას ამბობდა მასზე წმინდა მამა.
“გამოცხადება ვნახე, უფალი ვნახე, “საბაოთ”, ხელში გლობუსი ეჭირა, გლობუსზე კი დიდი ჯვარი იყო და იქიდან ხმა მოისმა:
“ბოლო ჟამს ადამიანებს სიმდაბლე, სიკეთე და სიყვარული გადაარჩენს! ჯოჯოხეთის ნახევარი უკვე დედამიწაზეა, ანტიქრისტე კართან დგას და შემოგლეჯას ცდილობს. თქვენ მოესწრებით ანტიქრისტეს. ანტიქრისტე მთელ დედამიწაზე გამეფდება და ყველგან იქნება დევნა. საქართველო ღვთისმშობლის წილხვედრი ქვეყანაა, ღვთისმშობელი დაიფარავს მას და ნაკლები დევნა იქნება.
როდესაც გაგიჭირდებათ, ნუ შეშინდებით, მე მოვალ და მოგეხმარებით, ოღონდ თქვენ ვერ დამინახავთ. ადრეც ეგონათ, რომ ანტიქრისტე მოვიდა, მაგრამ ადრე არ იყო ნიშნები. ომები რომ იყო, ეს არ იყო ნიშანი. მაშინ არ იყო ციური სასწაულები და საყოველთაო განდგომა… განდგომა კი მწვალებლობის ტოლფასია. მალე მთელი მსოფლიო გაერთიანდება ანტიქრისტეს რიცხვით.
ბოლო დროს ცაში ნუ დაიწყებთ ცქერას, რადგან ისეთი სასწაულები მოხდება, შეცდებით და დაიღუპებით.
ანტიქრისტე დაბადებულია და მისი ბეჭედი არა მარტო უხილავი, ხილულიც იქნება და ადამიანს ხელსა და შუბლზე დაესმება. მისთვის ტახტს უკვე ამზადებენ… ყოველ ადამიანს აღწერენ და თავიანთ სიებში შეიტანენ. აღარავის შეეძლება მათ გარეშე ცხოვრება, – ამქვეყნიური ძალაუფლება მათ ხელში გადავა.
ნებისმიერ პროდუქტს თავიანთ ნიშანს დაადებენ – ჯერ ხაზებით, შემდეგ კი აშკარად. ეს ხაზები უკვე ანტიქრისტეს ნიშანია და ფარულად კოდირებულ სამ ექვსიანს შეიცავს. ოცდაათი ხაზი იუდას წილ ოცდაათ ვერცხლს ნიშნავს და ღალატს და განდგომას გულისხმობს…
ნუ შეშინდებით, ლოცვა თქვით, ასეთ პროდუქტს ჯვარი გადასახეთ და ისე მიიღეთ… ეშმაკსაც შეგიძლია ზურგზე შეაჯდე და ტაძრამდე მიაყვანინო თავი, ოღონდ დემონის მიერ შემოთავაზებული სიტყვა და საქმე არ მიიღო, რა კეთილადაც უნდა მოგეჩვენოს, თორემ ეშმას ხაფანგში გაებმები და დაიღუპები” – წმ.გაბრიელ აღმსარებელი და სალოსი.
წყარო : პრაიმტაიმი
