“შშმ პირების უფლებების დაცვის გარანტიებზე “შეკრებისა და მანისფესტაციის შესახებ” კანონში ჩანაწერი უნდა გაკეთდეს”

შეზღუდული შესაძლებობის პირთა უფლებების დაცვის გარანტიებზე “შეკრებისა და მანისფესტაციის შესახებ” კანონში ჩანაწერი უნდა გაკეთდეს, – ამის შესახებ თბილისის საკრებულოს ადამიანის უფლებათა დაცვისა და სამოქალაქო ინტეგრაციის კომისიის თავმჯდომარე გულიკო ზუმბაძემ განაცხადა.

თბილისის საკრებულოში ადამიანის უფლებათა დაცვისა და სამოქალაქო ინტეგრაციის კომისიის სხდომა დასრულდა. კომისიამ 12 თებერვალს სპორტის სასახლეში მასობრივი ღონისძიების დროს შეზღუდული შესაძლებობების მქონე პირებისა და მაყურებლის უფლებათა დარღვევის ფაქტი განიხილა.

სხდომას თბილისის მერიის კულტურის ცენტრის ხელმძღვანელი ზურაბ წერეთელი, თბილისის მერიის შეზღუდული შესაძლებობების მქონე პირთა უფლებების დაცვის საბჭოს აღმასრულებელი მდივანი რატი იონათამიშვილი და სპორტის სასახლეში გამართული კონცერტის ორგანიზატორი, კომპანია “არტ პალასის” გენერალური დირექტორი მაკა შავგულიძე ესწრებოდნენ.

სხდომაზე ითქვა, რომ სპორტის სასახლის შენობა შეზღუდული შესაძლებობების მქონე პირებისათვის ადაპტირებული არ არის და გამოითქვა იმედი, რომ ეს პრობლემა აღმოიფხვრება.

ადამიანის უფლებათა კომისიის თავმჯდომარემ გულიკო ზუმბაძემ ჟურნალისტებთან საუბრისას განაცხადა, კომისიამ იმსჯელა შეკრებისა და მანიფესტაციის შესახებ კანონში გაკეთდეს ჩანაწერი, შეზღუდული შესაძლებობების მქონე პირების უფლებათა დაცვის გარანტიების შესახებ. კერძოდ, ყველა შენობას გააჩნდეს პანდუსი, მასობრივი ღონისძიებების დროს ამ პირებისათვის იყოს გამოყოფილი ტრანსპორტის გასაჩერებელი ადგილი. ასევე ასეთ მასობრივ ღონისძიებებზე მაყურებელთა შეზღუდვა განხორციელდეს გონივრულ ფარგლებში, როდესაც იქ სამთავრობო დაცვა ხორციელდება.