“შეშფოთებულები ვართ უკრაინაში არსებული ვითარებით და დღეს ჩვენ სხვა რუსეთს ვხედავთ,”-ამის შესახებ განცხადება, ჩრდილო ატლანტიკური ალიანსის გენერალურმა მდივანმა, ჰელსინკში ვიზიტისას გააკეთა.
იენს სტოლტენბერგის თქმით ფინეთს, რომელიც რუსეთთან 1300 კილომეტრიან საზღვარს იყოფს, შესაძლოა, მომდევნო 4 წლის განმავლობაში ალიანსის წევრობის პერსპექტივა გაუჩნდეს.
გარდა ამისა სტოლტენბერგის თქმით, რუსეთმა ბოლო პერიოდში დონბასში პრორუსი სეპარატისტების მხარდაჭერა კიდევ უფრო გაზარდა. საუბარია შეიარაღებასა და ჯავშან ტექნიკაზე, რომლის შეტანაც მხოლოდ რუსეთიდანაა შესაძლებელი.
“ცივი ომის დასრულების შემდეგ ნატო ცდილობს უფრო კონსტრუქციული ურთიერთობის ჩამოყალიბებას რუსეთთან. მაგრამ ამისთვის აუცილებელია რუსეთმა პატივი სცეს საკუთარ მეზობლებს და მათ საზღვრებს. ამიტომ ვთვლით რომ თავდაცვის გაძლიერება დიალოგის პროცესს ხელს არ უშლის,”-განაცხადა იენს სტოლტენბერგმა.