ვაზიანში, მეოთხე მექანიზირებული ბრიგადის სამწყობრო მოედანზე, ავღანეთის ისლამურ რესპუბლიკაში, “მტკიცე მხარდაჭერის” სამშვიდობო მისიაში მონაწილე ასეულის გაცილების ცერემონიალი გაიმართა. საზეიმო ცერემონიალს ესწრებოდნენ საქართველოს თავდაცვის მინისტრი მინდია ჯანელიძე, შეირაღებული ძალების გენერალური შტაბის უფროსი, გენერალ-მაიორი ვახტანგ კაპანაძე და თავდაცვის უწყების სხვა ხელმძღვანელი პირები.
გაცილების ცერემონიალზე ეროვნული გვარდიის სამხედრო-საჩვენებელმა ორკესტრმა საქართველოს სასხელმწიფო ჰიმნი შეასრულა. ასევე, მესამე ქვეითი ბრიგადის 31-ე მსუბუქი ქვეითი ბატალიონის ნაკრები ასეულის პირადმა შემადგენლობამ და მოწვეულმა სტუმრებმა წუთიერი დუმილით პატივი მიაგეს საქართველოს ტერიტორიული მთლიანობისთვის და საერთაშორისო მისიებში დაღუპულ ქართველი სამხედრო მოსამსახურეების ხსოვნას.
ცერემონიის დასასრულს პირადი შემადგენლობა მამა დავითმა დალოცა. როგორც ცნობილია, საქართველოს პარლამენტის 2014 წლის 26 დეკემბრის დადგენილების საფუძველზე 31-ე ქვეითი ბატალიონის ნაკრები ასეული 6 თვის ვადით ავღანეთის დედაქალაქ ქაბულში სამშვიდობო მისიაში მიიღებს მონაწილეობას.
ქართველი სამხედროების მთავარი ამოცანა ქაბულში მდებარე “მტკიცე მხარდაჭერის” ოპერაციის შტაბის უსაფრთხოების უზრუნველყოფა იქნება.
