სოფლის მეურნეობის მინისტრი, ოთარ დანელია უნგრეთის რესპუბლიკის სავაჭრო სახლის წარმომადგენლებს შეხვდა. შეხვედრაზე მხარეებმა საქართველოსა და უნგრეთის რესპუბლიკას შორის სავაჭრო-ეკონომიკური თანამშრომლობის გააქტიურების პერსპექტივები განიხილეს. როგორც შეხვედრაზე უნგრეთის რესპუბლიკის სავაჭრო სახლის წარმომადგენლებმა განაცხადეს, უნგრეთის მხარე დაინტერესებულია რეგიონის ქვეყნებთან (აზერბაიჯანი, საქართველო, თურქეთი) სავაჭრო-ეკონომიკური ურთიერთობების გააქტიურებით. სოფლის მეურნეობის მინისტრმა დეტალურად ისაუბრა იმ პროექტებზე, რომლებსაც სოფლის მეურნეობის სამინისტრო დარგის განვითარების მიმართულებით ახორციელებს. ოთარ დანელიამ განსაკუთრებული ყურადღბა საქართველოში არსებულ ბიზნეს კლიმატზე გაამახვილა. მინისტრის თქმით, მთავრობა მზად არის მაქსიმალურად ხელი შეუწყოს სოფლის მეურნეობაში ევროპული ინვესტიციების მოზიდვას. როგორც შეხვედრაზე უნგრეთის სავაჭრო სახლის წარმომადგენლბემა განაცხადეს, უნგრეთის მხარე გამოდის ინიციატივით, შეიქმნას ერთობლივი ფონდი, რომელიც ქართულ-უნგრული პროექტების დაფინანსებას განახორციელებს. აღინიშნა, რომ ამ პროექტების დიდი ნაწილი შეიძლება აგრარული მიმართულების იყოს. ეს არის სასოფლო-სამეურნეო პროდუქციის ექსპორტ-იმპორტი, ერთობლივი საწარმოების შექმნა და ა.შ. უნგრეთის სავაჭრო სახლის წარმომადგენლბთან შეხვედრას სოფლის მეურნეობის მინისტრის პირველი მოადგილე, ნოდარ კერესელიძე ესწრებოდა.
