“ძალიან მინდა, ქვეყნის ხელისუფლებას ყოველთვის ჰყავდეს მთავრობის მონიტორინგზე ორიენტირებული ოპოზიცია”

ჩვენს ინტერესებშია, “თავისუფალმა დემოკრატებმა” დაიკავოს ის ნიშა, რაც სხვა ოპოზიციურმა ძალებმა ვერ დაიკავეს და “ნაციონალებს” ერგო”, – ამის შესახებ საქართველოს ვიცე პრემიერმა, ენერგეტიკის მინისტრმა კახი კალაძემ ვიდეოდიალოგის ფარგლებში, იმ კითხვის საპასუხოდ განაცხადა, მიიჩნევდა თუ არა, რომ “ნაციონალური მოძრაობა” კონსტრუქციული ოპოზიციაა. “თქვენ თუ გახსოვთ, როცა “თავისუფალი დემოკრატები” გადავიდნენ ოპოზიციაში, ბევრმა ჩვენგანმა ეს ფაქტი განიხილა როგორც არსებითად ახალი, კონსტრუქციული ოპოზიციის შექმნის შანსი. მე არც ამ ეტაპზე შემიცვლია აზრი, მიმაჩნია, რომ ჩვენს ინტერესებშია, ეს ძალა გახდეს ოპოზიციური და დაიკავოს ის ცარიელი ნიშა, რაც უბრალოდ სხვა ოპოზიციურმა ძალებმა ვერ დაიკავეს და “ნაციონალებს” ერგოთ რიგითობის მიხედვით, არჩევნების შედეგების გათვალისწინებით. თუმცა, 2012 წლის არჩევნებზეც გარკვეული კითხვები არსებობს. მოსახლეობის მხრიდან გულმოწყალების, ხელისუფლების მხრიდან თანამშრომლობაზე მზადყოფნის მიუხედავად, “ნაციონალები” თავის პოლიტიკურად მანკიერ ჩვევებს ვერ თმობენ და მუდმივ დესტრუქციულ რეჟიმში იმყოფებიან”, – განაცხადა კალაძემ და დასძინა, რომ “ნაციონალები” ქვეყნის ხელისუფლებასთან და მოსახლეობასთან არაჯანსაღად ოპონირებენ. “ძალიან მინდა, ქვეყნის ხელისუფლებას ყოველთვის ჰყავდეს კონსტრუქციული, საქმის კეთებაზე და მთავრობის მონიტორინგზე ორიენტირებული ოპოზიცია, ვინაიდან ეს საერთო საქმეს წაადგება და ძალიან მნიშვნელოვანი იქნება ქვეყნის სწორად განვითარებისთვის”, – დასძინა კახი კალაძემ.