საქართველოს პრეზიდენტი გიორგი მარგველაშვილი ბათუმში საკონსტიტუციო სასამართლოს ახალი წევრის, მერაბ ტურავას მიერ ფიცის დადების ცერემონიას დაესწრო. “საქართველოს საკონსტიტუციო სასამართლოს შესახებ” საქართველოს ორგანული კანონის თანახმად, საკონსტიტუციო სასამართლოს წევრი თანამდებობის დაკავებამდე ფიცს დებს საქართველოს პრეზიდენტის, საქართველოს პარლამენტის თავმჯდომარისა და უზენაესი სასამართლოს თავმჯდომარის თანდასწრებით. შესაბამისად, საკონსტიტუციო სასამართლოს წევრის, მერაბ ტურავას ფიცის დადების ცერემონიას საქართველოს პრეზიდენტი გიორგი მარგველაშვილი, პარლამენტის თავმჯდომარე დავით უსუფაშვილი და უზენაესი სასამართლოს თავმჯდომარე ნინო გვენეტაძე დაესწრნენ. “მე გავხდი საკონსტიტუციო სასამართლოს წევრი პარლამენტის კვოტით. წარმადგინა უმრავლესობამ, მაგრამ ეს არ ნიშნავს, რომ მე ერთი პოლიტიკური ძალის წარმომადგენელი ვიქნები. დავიცავ ყველა ადამიანის, ფიზიკური და იურიდიული პირის და ყველა სუბიექტის ინტერესებს და გადაწყვეტილების მიღებისას ვიქნები ბოლომდე ობიექტური, დამოუკიდებელი და მიუკერძოებელი. შევეცდები ჩემი წვლილი შევიტანო საკონსტიტუციო კონტროლის კიდევ უფრო გაუმჯობესებაში, გაღრმავებასა და ახალ საფეხურზე აყვანაში”, – განაცხადა ფიცის დადების შემდეგ მერაბ ტურავამ. “მე ჩამოვედი ბათუმში იმისათვის, რომ ჩემი პატივისცემა გამოვხატო საკონსტიტუციო სასამართლოსა და ამ ერთ-ერთ უმნიშვნელოვანეს ინსტიტუტში ახალი მოსამართლის განწესების მიმართ. ვულოცავ ბატონ მერაბ ტურავას ამ საპასუხისმგებლო თანამდებობას. მიმაჩნია, რომ ის განსაკუთრებული როლი, რომელსაც საკონსტიტუციო სასამართლო თამაშობს ქვეყნის გამართულ ფუნქციონირებაში, კიდევ უფრო გაღრმავდება მისი მონაწილეობით ამ უმნიშვნელოვანეს სტრუქტურაში”, – განაცხადა გიორგი მარგველაშვილმა. მერაბ ტურავა საქართველოს პარლამენტმა 20 მარტს 84 ხმით ერთის წინააღმდეგ აირჩია. ეს თანამდებობა ვაკანტური 2013 წელს გახდა, როცა ვახტანგ გვარამიას უფლებამოსილების ათწლიანი ვადა ამოეწურა.
