მარიხუანას დეკრიმინალიზაციის მოთხოვნით თბილისში, საქართველოს პარლამენტის შენობასთან აქცია მიმდინარეობს, რომელშიც 200-მდე ადამიანი მონაწილეობს.
როგორც აქციის ერთ-ერთმა ორგანიზატორმა, ლექსო მაჭავარიანმა “თბილისი თაიმსთან” საუბრისას განაცხადა, დღევანდელი აქციით სოლიდარობას უცხადებენ იმ პატიმრებს, რომლებიც მარიხუანას მოხმარებისთვის არიან ციხეში.
„დეკრიმინალიზაცია არ ნიშნავს ლეგალიზაციას და ბუნებრივია, რომ არალეგალებული ქმედებისთვის სახელმწიფო რაღაც პერიოდის განმავლობაში მაინც შეინარჩუნებს ჯარიმებს. ჩვენი ამოცანაა, რომ ეს ჯარიმები შემოიფარგლოს მხოლოდ საზოგადოებრივი თავშეყრის ადგილებში მოხმარებით და არ გაგრძელდეს ის მანკიერი პრაქტიკა, რომელიც არსებობდა მარიხუანას მომხმარებელთა მიმართ საკმაოდ ბევრი წლის განმავლობაში და ითვალისწინებდა იმას, რომ ადამიანებს უვარდებოდნენ სახლში, აჩერებდნენ ქუჩაში, აიძულებდნენ მოეშარდათ და ა.შ“, – აცხადებს მაჭავარიანი.
აქციაში საზოგადოებისთვის ცნობილი სახეები მონაწილეობენ. მათ შორის არის მსახიობი დავით დარჩია. როგორც დარჩიამ განაცხადა, მარიხუანას მოხმარებისთვის ადამიანი არ უნდა ისჯებოდეს ისე, როგორც ისჯებიან მკვლელობებისთვის და სხვა მძიმე დანაშაულებისთვის.
გარდა ამისა, აქციაზე მიტანილები აქვთ სტიკერები და პლაკატები, წარწერით “მე არ ვარ კრიმინალი”.
02.06.13
სალი თაბუნიძე
