დღეს სასტუმრო რედისონში გაიმართება ათასწლეულის გამოწვევის ფონდის კონფერენცია თემაზე „ათასწლეულის გამოწვევის კორპორაციის მეორე კომპაქტის ინფრასტრუქტურის პროექტები და მიმდინარე და დაგეგმილი შესყიდვები“.
როგორც „თბილისი თაიმსს“ ფონდიდან აცნობეს, ათასწლეულის გამოწვევის კორპორაციის მეორე კომპაქტის ფარგლებში საქართველოში, გრანტის სახით, 60 მილიონ აშშ დოლარამდე ინვესტირება მოხდება საგანმანათლებლო ინფრასტრუქტურის პროექტების გახორციელებისათვის. დაგეგმილია საჯარო სკოლების რეაბილიტაცია, თბილისში საუნივერსიტეტო ფართების (ლაბორატორიებისა და სალექციო აუდიტორიების) რეაბილიტაცია-აღჭურვა, ახალი ლაბორატორიისთვის კორპუსის მშენებლობა და პროფესიული სასწავლებლების ინფრასტრუქტურული პროექტების დაფინანსება. ღონისძიებას დაესწრებიან ადგილობრივი და საერთაშორისო სამშენებლო კომპანიების წარმომადგენლები.
ფონდისვე ინფორმაციით, ათასწლეულის გამოწვევის ფონდის მიერ დაგეგმილი ინფრასტრუქტურული პროექტების განხორციელება, საინჟინრო და ტექნოლოგიური განათლების ხარისხის განვითარების გარდა, ხელს შეუწყობს საქართველოს ეკონომიკის გაძლიერებასა და დასაქმებას.
მთლიანად, ათასწლეულის გამოწვევის კორპორაციის მეორე კომპაქტის ფარგლებში მოხდება 140 მილიონი აშშ დოლარის ინვესტიცია საგანმანათლებლო პროექტების განხორციელებისთვის, შემდგომი ხუთი წლის განმავლობაში.
კონფერენციაზე წარმოდგენილი იქნება დეტალური ინფორმაცია მიმდინარე და დაგეგმილი შესყიდვებისა და ინფრასტრუქტურის პროექტების შესახებ.
2013 წელს აშშ-ის ათასწლეულის გამოწვევის კორპორაციასა და საქართველოს მთავრობას შორის ხელი მოეწერა მეორე კომპაქტს, რომლის მიზანია საქართველოში სიღარიბის დაძლევა და ეკონომიკური ზრდის ხელშეწყობა ზოგადი, ტექნიკური, პროფესიული და უმაღლესი განათლების ხარისხის განვითარების გზით. კომპაქტი ძალაში შევიდა 2014 წლის 1 ივლისს და ხორციელდება მომდევნო ხუთი წლის განმავლობაში ათასწლეულის გამოწვევის ფონდი – საქართველოს მიერ.
