“საზოგადოებრივ მაუწყებელში” ინახება მხოლოდ ტელეკომპანია “პირველი კავკასიურის” (პიკ-ის) საეთერო შეფუთვით გასული მასალა, ხოლო ყველა მასალის ორიგინალი კვლავ ინახება ტელეკომპანია “პიკ”-ში.
ამის შესახებ ნათქვამია “საზოგადოებრივი მაუწყებლის” მიერ გავრცელებულ განცხადებაში.
მათივე ინფორმაციით, გუშინ, ინტერნეტსივრცეში გაჩნდა ინფორმაცია, რომ ავღანეთში მომხდარ ტერაქტამდე რამდენიმე საათით ადრე გავრცელებულ ანტიქართულ ვიდეოში გამოყენებული იყო “ტელეკომპანია პიკის” ვიდეომასალა, რომელიც, თითქოსდა ინახება საზოგადოებრივი მაუწყებლის არქივში.
“საზოგადოებრივი მაუწყებელი აცხადებს, რომ 2012 წლის 13 ნოემბრის შეთანხმების საფუძველზე, სსიპ “საზოგადოებრივ მაუწყებელსა” და “ტელეკომპანია პიკ”-ს შორის შეწყდა ხელშეკრულება, რომლის ფარგლებშიც მაუწყებელს გადაეცა “პიკ”-ის მიერ დამზადებული და სატელევიზიო ეთერში გასული ტელეპროდუქცია, რაც არ მოიცავს მასალის ორიგინალს, რომელიც დაცული უნდა იყოს და ინახებოდეს არქივში. აღნიშნული ხელშეკრულების საფუძველზე, სსიპ “საზოგადოებრივი მაუწყებელში” ინახება მხოლოდ “ტელეკომპანია პიკ”-ის საეთერო შეფუთვით გასული მასალა, ხოლო ყველა მასალის ორიგინალი კვლავ ინახება “ტელეკომპანია პიკ”-ში”, -ნათქვამია განცხადებაში.
07.06.13
