თბილისის მერი დავით ნარმანია და ვიცე-მერი დიმიტრი ქუმსიშვილი ქალაქების ურბანულ განვითარებაზე მომუშავე კომპანია “პან პლან”-ის გენერალურ დირექტორს, ავსტრიის ინფრასტრუქტურის განვითარების ყოფილ მინისტრს პიტერ შნაიდერს შეხვდნენ.
შეხვედრაზე თბილისის გენერალური გეგმის მოსამზადებელ სამუშაოებსა და გამოცხადებულ კონკურსზე ისაუბრეს. თბილისის მერმა პიტერ შნაიდერს შესაბამისი სამსახურების ხელმძღვანელებთან ერთად გენერალური გეგმის მოსამზადებლად გამოცხადებულ კონკურსში მონაწილეობა შესთავაზა. გარდა ამისა, დავით ნარმანიამ შესთავაზა პიტერ შნაიდერს, ჩაერთოს ჟიურის მუშაობაში და მისი კომპეტენციის ფარგლებში მერიას გენერალური გეგმის განვითარებაში დაეხმაროს. შეხვედრაზე გენერალური გეგმის მომზადების პროცესის ზედამხედველობაზეც იმსჯელეს. აღინიშნა, რომ შესაბამისი პროცედურების დაცვით, “პან პლან”-თან თანამშრომლობა ასევე შესაძლებელია.
„პიტერ შნაიდერი არის ძალიან გამოცდილი და კვალიფიციური სპეციალისტი. ის ურბანული განვითარების მიმართულებით თავის გამოცდილებასა და შესაბამის ფინანსურ რესურსებს გვთავაზობს, რაც ავსტრიის განვითარების სააგენტოდან შეიძლება მოვიზიდოთ“, – განაცხადა დავით ნარმანიამ.
„ქალაქის ურბანული განვითარების გეგმასთთან დაკავშირებით ძალიან დიდი ინტერესია. გამოცხადებულია კონკურსი წინადადებების წარდგენაზე პროექტზე სამუშაოდ. იმედი გვაქვს, რომ შევძლებთ, დავეხმაროთ თბილისის მუნიციპალიტეტს ამ საქმეში“, – განაცხადა პიტერ შნაიდერმა.
შეხვედრას თბილისის მერთან და ვიცე-მერთან ერთად, თბილისის მერიის ეკონომიკური პოლიტიკის სამსახურის უფროსი ირაკლი ბერეკაშვილი, არქიტექტურის სამსახურის უფროსი ნინო ღოღობერიძე და გამწვანების სამსახურის უფროსი ბიძინა გიორგობიანი ესწრებოდნენ.
