საჩხერეს განახლებული მუნიციპალური ნაგავსაყრელი მოემსახურება. კეთილმოწყობის მიზნით ჩატარებულ სამშენებლო-სამონტაჟო სამუშაოებს დღეს, ადგილზე, რეგიონული განვითარებისა და ინფრასტრუქტურის სამინისტროს მყარი ნარჩენების მართვის კომპანიის დირექტორი გიორგი შუხოშვილი ადგილობრივ მოსახლეობასთან და თვითთმართველობის წარმომადგენლებთან ერთად გაეცნო.
სამინისტროს ინფორმაციით, საჩხერის მუნიციპალური ნაგავსაყრელი, რომლის ფართობი 15979 კვადრატულ მეტრს შეადგენს, 2001 წლიდან ფუნქციონირებს. პოლიგონზე ყოველდღიურად საჩხერის მუნიციპალიტეტისა და მისი მიმდებარე სოფლებიდან 60 მ³ ნარჩენი შედის.
საჩხერის ნაგავსაყრელი „საქართველოს მყარი ნარჩენების მართვის კომპანიას“ საკუთრებაში 2013 წლის 10 მაისს გადაეცა. იმ დროისთვის პოლიგონი სტანდარტების შეუსაბამოდ ოპერირებდა. ნარჩენების შეტანა ხდებოდა არაორგანიზებულად. ნაგავსაყრელი ვერ აკმაყოფილებდა ეკოლოგიურ და სანიტარულ ნორმებს.
შპს “საქართველოს მყარი ნარჩენების მართვის კომპანიამ” საქართველოს რეგიონული განვითარებისა და ინფრასტრუქტურის სამინისტროს კოორდინაციით, ტერიტორიის შემოღობვა განახორციელა, მოაწყო პოლიგონის შიდა გზები, წყალარინების არხები. ასევე, მოხდა ტერიტორიის ელექტრიფიცირება. ნაგავსაყრელის კეთილმოწყობის პროექტის ღირებულებამ 231 699 ლარი შეადგინა.
