„წმინდა ილია მართლის (ჭავჭავაძის) გაზეთ „ივერიის“ სახელობის პროზა-პოეზიის პრემია – „ივერიის“ (წელიწადი მეორის) მეოთხე ტურის ღონისძიებას მსოფლიო საოცრება მხარემ, თუშეთმა უმასპინძლა. საოცარ თუშეთს, კარგი პოეტებითა და ადგილობრივი გულღია და გულკეთილი ხალხით შეხვდა პროექტს.
„სრულიად საქართველოს კათოლიკოს – პატრიარქის, უწმინდესის და უნეტარესის, ილია მეორის ლოცვა კურთხევით დაწყებულ პროექტს პოპულარობა თავისმა ორიგინალურმა ხედვამ და მიმართულებამ მოუტანა, რომელსაც პროზა-პოეზიის, ხატმწერების, მხატვრებისა და ფოტოხელოვანების ერთობლიობა ჰქვია. რომელიც ხელოვნების ნამდვილ დღესასწაულად იქცა ყოველი თურად. ასეთი იყო წელიწადი მეორის მეოთხე ტურიც. ამ ტურის მასპინძელი ახმეტის მაჟორიტარი დეპუტატი ზურაბ ზვიადაური გახლდათ, რომელიც საკუთარი ინიციატივით ჩაერთო პროექტში და ერთ-ერთ დიდ და ეროვნულ პროექტად აღიარა“, – განაცხადა პროექტისა და პრემიის დამფუძნებელმა ნუგზარ ჭიაბერაშვილმა.
„ეს პროექტი ერთ-ერთი ყველაზე ეროვნულია და ყველა პოეტი, მწერალი და, რა თქმა უნდა, ხატმწერი, მხატვარი და ფოტოხელოვანია ჩართული. ეს ადამიანები ჩვენი საუკუნის ჟამთააღმწერები არიან და ბედნიერი ვარ, რომ მათთან ერთად მიწევს ამ პროექტის განხორციელება. ყველა ხელოვანი უნდა ჩაერთოს ამ ეროვნულ საქმეში, რათა ეროვნული ცნობიერება ამაღლდეს მეტად და გაერთიანდეს ჩვენი ქვეყანა ხელოვნებით, რადგან პოეტს და მწერალს უდიდესი ძალა აქვს საზოგადოების სწორად აღზრდისთვის და მოტივაციისთვის, თუ როგორები უნდა იყოს ადამიანი და როგორ უნდა ემსახურებოდეს საკუთარ სამშობლოს. მსგავსი ფუფუნება თუშეთს, განსაკუთრებით კი ომალოს ნამდვილად აკლია და დღეიდან ვიწყებთ ამ დანაკლისის აღმოფხვრას. აქვე საჯაროდ გპირდებით, რომ მომდევნო ეტაპს ხევსურეთში ვუმასპინძლებ ისევ ჩემი ინიციატივით, რადგან მეტად მოხიბლული ვარ პროექტის მსვლელობით, ღრმა შინაარსით და მონაწილეებით, ამაყიც ვარ და ბედნიერიც, რომ ასეთი ლამაზი და გენიალური პოეტების თაობა გვყავს, განსაკუთრებით ახალგაზრდებში, ძველ თაობაზე რომ აღარაფერი ვთქვა. მე მუდმივ ჩართული ვიქნები ამ პროექტის განხორციელებაში, რათა მეტი და მეტი პოპულარიზაცია მოხდეს უდიდესი ეროვნული საქმისა, მით უმეტეს, რომ მისი უწმინდესობის ლოცვა-კურთხევით ხორციელდება და წმინდა ილია მართლის სახელს ატარებს პრემია „ივერია“. ეს პროექტი საქართველოს ყველა კუთხის შემოქმედებას აერთიანებს და მჯერა, რომ საკითხის ასეთი მიდგომა უმნიშვნელოვანესია იმ თვალსაზრისითაც, რომ ყველა მხარის შემოქმედს შეეძლებათ ხმა მიაწვდინოს ხალხს, თავისი სათქმელი უთხრას ლექსად, ხატით, ნახატით… თუშური პოეზია თავისებურად ღრმაა და საოცრად ლამაზი და დღეს ამაში კიდევ ერთხელ დავრწმუნდით, განსაკუთრებით წოვა თუშური, რომელი დიალქეტითაც სულ რამდენიმე ადამიანი წერს და სწორედ ეს არ უნდა დავკარგოთ, აუცილებლად უნდა შევინარჩუნოთ ჩვენ, ამ პროექტის საშუალებით“, – განაცხადა ზურაბ ზვიადაურმა.
საქართველოს პარლამენტის წევრი ომარ ნიშნიანიძეც ესწრებოდა მეოთხე ტურს, რომელიც სრულ აღფრთოვანებაში მოვიდა და სიტყვით გამოსვლის დროს მოითხოვა: „ეს პროექტი იმდენად დიდი, ღრმა და მდიდარი ხასიათისაა, რომ იგი აუცილებლად უნდა წავიღოთ ქუთაისში, მე ვარ ამ საკითხის ინიციატორი და თუ ისურვებთ და ნებას დამრთავთ, მე ვუმასპინძლებ. გარდა ამისა, თერჯოლაში მინდა მოხვდეს თქვენი პრემიის ერთ-ერთი ტური, რაც დიდი პატივი იქნება იმერეთისთვის.
ღონისძიებას თუშეთში, საქართველოს პარლამენტის წევრი, ცნობილი მსახიობი გია ჯაფარიძეც ესწრებოდა, რომელმაც სიტყვით მიმართა ხალხს: „მიხარია, რომ მსგავსი საინტერესო პროექტი იმართება თუშეთში და ვიმედოვნებ ეს ტრადიციული გახდება. მჯერა, რომ მსგავსი პროექტები დიდ წვლილს შეიტანს ჩვენი ერის სულიერებასა და გამთლიანებაში. პროექტით აღფრთოვანებული ვარ და მეც გამოვთქვამ სურვილს და თხოვნას დამფუძნებლებთან, რომ რაჭასაც ეწვიოს ეს დიდებული საქმე, მე ვუმასპინძლებ“. ბოლოს კი ვაჟა ფშაველას ლექსი წაუკითხა საზოგადოებას.
ღონისძიების დასასრულს ზურაბ ზვიადაურმა მეოთხე ტური კონკურსანტები მონაწილის სიგელებით და წმინდა ილია მართლის ხატებით დააჯილდოვა, რომელიც „საგამომცემლო სახლ ქართულ ელიტას“ ეკუთვნის. ბოლოს კი თავადაც მიიღო მსგავსი სიგელი და ხატი, როგორც მხარდამჭერმა, ერთ-ერთი პარტნიორისგან, გიორგი კაკუშაძისგან.
პრემიის წელიწადი მეორის მეხუთე ტური ხევსურეთში გაიმართება, რომელსაც ისევ ზურაბ ზვიადაური უმასპინძლებს.
