საქართველოს იუსტიციის სამინისტროს მმართველობის სფეროში მოქმედი სსიპ „საქართველოს იუსტიციის სასწავლო ცენტრი“ არასრულწლოვანთა მართლმსაჯულების რეფორმის ფარგლებში ტრენერთა გადამზადების კურსს იწყებს. სწავლების მიზანი იმ მიდგომების პრაქტიკული რეალიზაციაა, რასაც ახალი კანონმდებლობა კანონთან კონფლიქტში მყოფ არასრულწლოვანთათვის ითვალისწინებს − იუსტიციის სამინისტროს მიერ მომზადებული და საქართველოს პარლამენტის მიერ მიღებული „არასრულწლოვანთა მართლმსაჯულების კოდექსის“ თანახმად, არასრულწლოვანთა საქმეები მხოლოდ არასრულწლოვანთა საქმეებში სპეციალიზებულმა მოსამართლეებმა, პროკურორებმა, გამომძიებლებმა, პოლიციელებმა, ადვოკატებმა და სოციალურმა მუშაკებმა უნდა აწარმოონ.
ტრენინგში სხვადასხვა უწყების 40-მდე თანამშრომელი მონაწილეობს. შინაგან საქმეთა სამინისტროს, მთავარი პროკურატურის, იუსტიციის უმაღლესი სკოლის, სასჯელაღსრულებისა და პრობაციის სასწავლო ცენტრის, იურიდიული დახმარების სამსახურის, საქართველოს ადვოკატთა ასოციაციის, საქართველოს იუსტიციის სასწავლო ცენტრის წარმომადგენლები მომდევნო ეტაპზე თავად გადაამზადებენ თავიანთ კოლეგებს, რომლებიც არასრულწლოვანთა საქმეებზე იმუშავებენ.
ტრენინგის მონაწილეები შეისწავლიან ისეთ საკითხებს, როგორიცაა: არასრულწლოვანთა მართლმსაჯულების საერთაშორისო ინსტრუმენტები, ანტისოციალური ქცევის ფსიქოლოგიური ასპექტები, ძალადობა ბავშვზე და მისი გავლენა ბავშვის განვითარებაზე, დაზარალებული და მოწმე ბავშვის დაკითხვა/გამოკითხვა, არასრულწლოვანთა მართლმსაჯულება (საკანონმდებლო ცვლილებები) და სხვ.
ტრენინგს გაუძღვებიან იუსტიციის მინისტრის პირველი მოადგილე ალექსანდრე ბარამიძე, უცხოელი და ქართველი ექსპერტები: ევროკავშირის პროექტის − „სისხლის სამართლის სისტემის რეფორმის მხარდაჭერა საქართველოში“ − და გაერო-ს ბავშვთა ფონდის წარმომადგენლები.
არასრულწლოვანთა მართლმსაჯულების ახალი კოდექსი სპეციალიზებული, ევროპული სტანდარტებისა და გაერო-ს ბავშვთა უფლებების დაცვის კონვენციასთან შესაბამისობაში მოყვანილი მართლმსაჯულების სისტემის შექმნას ითვალისწინებს და ერთ საკანონმდებლო აქტში აერთიანებს არასრულწლოვანთა პასუხისმგებლობის, ადმინისტრაციული, სისხლის სამართლის პროცესის, სასჯელაღსრულებისა და სხვა საკითხების მარეგულირებელ ნორმებს; აწესებს არასრულწლოვანთა უფლებების დაცვის ახალ სტანდარტსა და მექანიზმებს. მისი მთავარი საკანონმდებლო სიახლე18 წლამდე ასაკის პირებისათვის მართლმსაჯულების სპეციალიზებული ინსტიტუტის შექმნაა.
ტრენერთა გადამზადების კურსი ორ ეტაპად ჩატარდება. ტრენინგების პირველი ნაწილი 16-23 ივლისს გაიმართება. კურსი განხორციელდება ევროკავშირის ფინანსური მხარდაჭერით.
