„საქართველოს ბანკმა“ და კომპანია „სითი ემმმა“ ხელი მოაწერეს 12 მილიონი აშშ დოლარის ოდენობის სასესხო ხელშეკრულებას საქართველოში 5-ვარსკვლავიანი უმაღლესი კლასის სასტუმროს – „რიქსოს თბილისის“ ბოლო ეტაპის მოპირკეთების და მოწყობის მიზნით.
როგორც “თბილისი თაიმსს” საქართველოს ბანკიდან აცნობეს, „რიქსოს თბილისი“, რომლის ბიუჯეტი 35 მილიონი დოლარია, გუდიაშვილის ქ. №3-ში განთავსდება, სადაც 150 სასტუმრო ოთახი იქნება, მათ შორის, 32 ფეშენებელური ლუქსი და 500 კვ.მ-ის ფართობის საპრეზიდენტო აპარტამენტი პანორამული ლიფტით. სასტუმროში ასევე განთავსდება: საცურაო აუზი, 500 კვ.მ-ზე მოწყობილი აზიური სპა, სამი კაფე-ბარი და რესტორანი, მათ შორის, პანორამული „სქაი ბარი“, 5 საკონფერენციო დარბაზი და 1 000 კვ.მ ფართობის ფოიე, რომელიც გადაიქცევა ბიზნესშეხვედრების სივრცედაც. 5-ვარსკვლავიანი სასტუმროს – „რიქსოს თბილისის“ – მთავარი მისაღების ინტერიერზე ებრაელი, თურქი და იტალიელი ცნობილი დიზაინერები მუშაობენ. ასევე სპეციალურად „რიქსოს თბილისის“ მთავარი მისაღებისთვის კომპანია „ლასვიტის“ წამყვანი დიზაინერები ამზადებენ ექსკლუზიურ ჭაღს.
