ჩინელმა ღვინის მკვლევარმა, ია ოგუ ლინმა ქართულ ღვინოზე წიგნი – „ქართული ღვინის მკვლევარი“ გამოსცა. ავტორი ნაშრომში წარმოაჩენს ქართული ღვინის ტრადიციასა და საქართველოს კულტურულ ღირებულებებს.
როგორც “თბილისი თაიმსს” სოფლი მეურნეობის სამინისტროდან აცნობეს, ია ოგუ ლინს ღვინის კვლევის 13 წლიანი გამოცდილება გააჩნია. ბოლო პერიოდში განსაკუთრებით დაინტერესდა ქართული ღვინით.
მკვლევარის თქმით, სამწუხაროა რომ ადრე არ დაინტერესდა ქართული ღვინით, რადგან დარწმუნებულია რომ საქართველო არის ღვინის უძველესი წარმოშობის ქვეყანა, სადაც სათავეს იღებს ღვინის წარმოების ტრადიცია.
„მაქსიმალურად ვცდილობ ჩინეთის მოსახლეობას გავაცნო ქართული ღვინის კულტურა, შესაბამისად დავწერე წიგნი რომელიც 30 ათასზე მეტი ტირაჟით გამოვიდა და ჩინეთის ყველა პროვინციაში გავრცელდება“, – აღნიშნა მკვლევარმა ია ოგუ ლინმა.
აღსანიშნავია, რომ საქართველოს ეკონომიკური სამინისტროს ტურიზმის ადმინისტრაციის ორგანიზებითა და მოწვევით საქართველოში ჩამოვიდა 28 ჩინელი ჟურნალისტი, რომელთა შორის იმყოფება ჩინელი მკვლევარი ია ოგუ ლინი. დღეს, მათ სოფლის მეურნეობის სამეცნიერო-კვლევითი ცენტრის ჯიღაურას ბაზა დაათვალიერეს.
