„თბილისობა 2015“ 17 – 18 ოქტომბერს გაიმართება. ქალაქი თბილისელებს და მის სტუმრებს განსხვავებული ფორმატით უმასპინძლებს. შემოდგომის 36-ე დღესასწაულის დაგეგმვაში წელს, თავად, მოქალაქეები იყვნენ ჩართულები. თბილისის მერიამ კონკურსის „ჩემი თბილისობა“ მეშვეობით საუკეთესო კონცეფციები შეარჩია და ღონისძიებები სწორედ აღნიშნული კონცეფციების გათვალისწინებით დაიგეგმა. „თბილისობა 2015“-ის პროექტთან დაკავშირებით დღეს საკრებულოში მორიგი შეხვედრა გაიმართა, სადაც დაგეგმილი ღონისძიებების საბოლოო პროგრამა განიხილეს. სახალხო დღესასწაულის ბიუჯეტი 977 000 ლარს შეადგენს და სხვადასხვა კულტურულ სპორტულ და საბავშვო ღონისძიებას მოიცავს. „თბილისობას“ 16 ოქტომბერს, საღამოს „საპატიო თბილისელის“ დაჯილოვების ცერემონია გახსნის. 17 და 18 ოქტომბერს, რიყის პარკში დაგეგმილია სხვადასხვა ჟანრის კონცერტები, ღია ტურნირები ჭადრაკსა და ჭიდაობაში, საბავშვო ღონისძიებები და „ლაივ ფესტივალი“ ახალგაზრდებისთვის. “თბილისობა 2015”-ის ფარგლებში, წელს პირველად გაიმართება კულინარიის ფესტივალი. პარკში მისულ სტუმრებს საშუალება ექნებათ დააგემოვნონ როგორც ქართული, ასევე, მსოფლიოს სხვადასხვა ქვეყნის ეროვნული კერძები. რიყის პარკის შადრევანთან კი, ღვინის ქალაქი მოეწყობა. 17 ოქტომბრის კულმინაცია, მიშა მდინარაძის პროექტი იქნება, რომელიც წარმოაჩენს თბილისური მუსიკის ტრანსფორმაციას ბოლო 2 საუკუნის განმავლობაში. წელს პირველად, ჩვენს მოქალაქეებს შესაძლებლობა ექნებათ „თბილისზე მზრუნველი“ თავად აირჩიონ, დასახელებული კანდიდატებისთვის ხმის მიცემის საფუძველზე. 18 ოქტომბერს მუშტაიდის პარკიდან სტარტს აიღებს კოსტიუმირებული მსვლელობა „შემოდგომა და გარემო“, რომელიც გორგასლის მოედანზე გალა კონცერტს შეუერთდება. „თბილისობა 2015“ გარემოს დაცვასა და ეკოლოგიას ეძღვნება. დღესასწაულის ფარგლებში თბილისის ეკოლოგიისა და გამწვანების მიმართულებით, სტრატეგიის პრეზენტაცია მოეწყობა. ასევე გაიმართება სხვადასხვა თემატური შემეცნებითი აქტივობები.
