მომსახურების სახეობებს შორის ტურიზმის ინდუსტრია ერთ-ერთი ყველაზე მსხვილი და სწრაფად მზარდია მთელს მსოფლიოში. მოგზაურობისა და ტურიზმის მსოფლიო საბჭოს მონაცემები, რომლებიც ყოველწლიურად იზრდება, გვამცნობს, რომ ამ დარგის პირდაპირმა კონტრიბუციამ მთლიან მსოფლიო შიდა პროდუქტებში ორ ტრილიონს გადააჭარბა.
ტურიზმის სექტორს განსაკუთრებული მნიშვნელობა გააჩნია საქართველოსთვის. ჩვენი ქვეყანა სხვა განვითარებადი ქვეყნების მსგავსად იძენს ფიზიკურ კაპიტალსა და ტექნიკურ გამოცდილებას, ამ ორ მნიშვნელოვან ფაქტორთან ერთად საქართველო მდიდარია ისტორიული ღირსშესანიშნაობებით, ორიგინალური ტრადიციებითა და სხვა თავისებურებებით.
ამ სექტორის განვითარებაში ყველაზე დიდი წვლილი საქართველოს ტურიზმის ეროვნულ ადმინისტრაციას შეაქვს, მისი როგორც სახელმწიფო პოლიტიკის გამტარებელი ორგანოს მთავარი მისიაა საერთაშორისო ბაზარზე საქართველოს,როგორც ტურისტული ქვეყნის ცნობადობის გაზრდა და ტურიზმის ბიზნესისთვის ხელსაყრელი გარემოს შექმნა. 2015 წლის იანვარი-აგვისტოს ტურისტული სეზონი ადმინისტრაციამ პოზიტიურად შეაფასა.
რომელი ქვეყნებიდან, რომელ რეგიონებში დაფიქსირდა ყველაზე მეტი ტურისტის შემოსვლა, რა ფაქტორებმა განაპირობეს ამ სეზონზე პოზიტიური ტენდენციები და რა არის დაგეგმილი მიმდინარე წლის ზამთრისა და 2016 წლის სეზონისთვის, ამ საკითხებზე ვრცლად „თბილისი თაიმსს“ საქართველოს ტურიზმის ეროვნული ადმინისტრაციის ხელმძღვანელი, გიორგი ჩოგოვაძე ესაუბრა.
როგორ აფასებს ეკონომიკისა და მდგრადი განვითარების სამინისტრო 2015 წლის ტურისტულ სეზონს და რას ეყრდნობა ტურიზმის შეფასების სტატისტიკა?
– 2015 წლის ტურისტული სეზონი შეიძლება პოზიტიურად შეფასდეს. 2015 წლის იანვარი-აგვისტოს პერიოდში საერთაშორისო შემოსვლების რაოდენობამ 3,922,376 შეადგინა და წინა წელთან შედარებით 6%-იანი ზრდა დაფიქსირდა. ზრდის ტენდენცია უფრო შთამბეჭდავი იყო ზაფხულის სეზონზე. 2015 წლის ზაფხულის სეზონზე (ივნისი, ივლისი, აგვისტო) საქართველოს 2,086,831 საერთაშორისო მოგზაური ეწვია, ზრდა წინა წლის ანალოგიურ პერიოდთან შედარებით 10%-ია.
აღსანიშნავია, რომ უცხოური საგადასახადო ბარათებით განხორციელებული გადახდების მოცულობამ აპრილში +47%, მაისში +43%, ივნისი +24%, ივლისი +32% შეადგინა.
2015 წლის მეორე კვარტლის მონაცემებით მნიშვნელოვნად გაიზარდა (+17,3%) ტურიზმის სფეროში შექმნილი დამატებული ღირებულება და ტურიზმის წილმა ქვეყნის მთლიან შიდა პროდუქტში 7,1% შეადგინა, რაც უპრეცედენტო მაჩვენებელია.
ტურიზმის შესაფასებლად კომპლექსური მიდგომა გამოიყენება და ძირითად ინდიკატორებში პოზიტიური ტენდენცია შეინიშნება.
უკვე გამოქვეყნდა სექტმებრის სტატისტიკაც, და აქაც მონაცემები შთამბეჭდავია. წინა წლის ანალოგიურ პერიოდთან შედარებით ზრდა 12.6 %- ია. მათ შორის იმ უცხოელი მოგზაურების ანუ ტურისტების რიცხვი, რომლებმაც 24 საათი და მეტი დაჰყვეს საქართველოში 15,8 %-ით გაზრდილი წინა წლის სექტემბერთან შედარებით.
როგორ გამოიყურება სტატისტიკური მონაცემები და რომელი ქვეყნებიდან დაფიქსირდა ყველაზე მეტი ტურისტის შემოსვლა საქართველოში?
– 2015 წლის იანვარი აგვისტოს პერიოდში საერთაშორისო შემოსვლებით კვლავ მეზობელი ქვეყნები ლიდერობენ, მათზე მთლიანი შემოსვლების 88% მოდის. საერთაშორისო მოგზაურების ყველაზე დიდი რაოდენობა სომხეთიდან დაფიქსირდა 944,029 (+14%), რაც მთლიანი საერთაშორისო მოგზაურების 24%-ს შეადგენს. შემდეგი არის აზერბაიჯანი 932,054 და თურქეთი 926,755 მოგზაურით. რუსეთი სტაბილურად ინარჩუნებს მეოთხე ადგილს 642,934 (+15%). საერთაშორისო შემოსვლების ზრდის თვალსაზრისით კი გამოირჩეოდნენ: სომხეთი (+14%), რუსეთი (+15%), აზერბაიჯანი (+8%), არაბთა გაერთიანებული საემიროები (+766%) და ისრაელი (+29%).
თვის დასაწყისში ადმინისტრაციამ პრესკონფერენცია გამართა და პოზიტიურად შეაფასა ტურისტული სეზონის 8 თვე, თქვენი შეფასებით კონკრეტულად რომელმა პროექტებმა და ცვლილებებმა განახორციელა პოზიტიური ტენდენციები?
– საერთაშორისო მოგზაურების ზრდა მნიშვნელოვნად განაპირობა საქართველოს ტურიზმის ეროვნული ადმინისტრაციის მიერ განხორციელებულმა მარკეტინგულმა კამპანიებმა. 2015 წლის დასაწყისში საერთაშორისო მოგზაურების კლება შეინიშნებოდა. საერთაშორისო მოგზაურების შემოდინებაში პირველივე უარყოფითი სიგნალების დაფიქსირების აღმოჩენისთანავე მოხდა კლების მიზეზების ანალიზი და გამოსწორების გზების ძიება.
სასწრაფო წესით შეიქმნა კრიზისის მენეჯმენტის საბჭო, სადაც განისაზღვრა აღნიშნულ გარემოებებში ბაზრების დივერსიფიკაციის აუცილებლობა და შედეგად ჩამოყალიბდა სამოქმედო გეგმა. გეგმის მიხედვით აქცენტი იმ საერთაშორისო აქტივობებზე გაკეთდა, რომელიც ახალი ბაზრებიდან მოგზაურების გაზრდას გაუკეთებდა სტიმულირებას და უკვე ათვისებულ ბაზრებზე სიტუაციას გამოასწორებდა.
საერთაშორისო მოგზაურების მოსაზიდად განხორციელდა შემდეგი ღონისძიებები: მარკეტინგული კამპანიები 9 მიზნობრივ ბაზარზე (რუსეთი, უკრაინა, ბელორუსი, ყაზახეთი, აზერბაიჯანი, ლატვია, უნგრეთი, ისრაელი თურქეთი), მარკეტინგული კამპანიები საერთაშორისო მედიის საშუალებით (CNN; Euronews), 300-მდე მეტი ჟურნალისტის მოწვევა, მედია-ფორუმი, მოლაპარაკების წარმოება ახალი პირდაპირი რეისების დასანიშნად და არსებულის გასაზრდელად.
ქვეყნის მასშტაბით, რომელი რეგიონი იყო ტურისტების ეპიცენტრში და როგორ გამოიყურება ტურისტების შემოსვლის სტატისტიკა მთიან რეგიონებში?
– საერთაშორისო მოგზაურებს შორის ყველაზე პოპულარული თბილისია (46%), მას მოსდევს ბათუმი (41%) და მარნეული (8%). რაც შეეხება მთიან რეგიონებს, მათგან ყველაზე პოპულარულია ყაზბეგი და მესტია.
როგორ ფიქრობთ, გარდა ინფრასტრუქტურისა, რა წარმოადგენს ტურისტული სეზონის გაუმჯობესების სხვა მნიშვნელოვან კომპონენტს?
– ტურისტული სეზონის გაუმჯობესებას ბევრი კომპონენტი უწყობს ხელს, რა თქმა უნდა ერთერთი მთავარი, როგორც თქვენ ახსენეთ არის ინფრასტრუქტურა, მაგრამ ასევე დიდი მნიშვნელობა ენიჭება შეთავაზებების მღავალფეროვნებას, ხელმისაწვდომ ფასებს, მომსახურების ხარიხს, ინფორმაციის ხელმისაწვდომობას. დიდ როლს თამაშობს სტუმართმასპინძლობა და თვითმყოფადი კულტურა.
რა სიახლეებია დაგეგმილი ზამთრისა და 2016 წლის ტურისტული სეზონისთვის?
– მიმდინარე წლის ზამთრის და 2016 წლის ტურისტული სეზონის რეკლამირებისა და ქვეყანაში დამატებითი ვიზიტორების მოზიდვის მიზნით, დაგეგმილია სახვადასხვა სახის მარკეტინგული აქტივობების განხორციელება, როგორც საერთაშორისო ასევე ადგილობრივ ბაზარზეც.
კერძოდ, ზამთრის ტურისტული პოტენციალის და ზოგადად წლის განმავლობაში ქვეყნის ტურისტული ღირსშესანიშნაობების წარმოჩენის მიზნით, იგეგმება შემდეგი ქმედებები: საერთაშორისო ტურისტულ ბაზრობებეში მონაწილეობა, მიზნობრივ ქვეყნებში მარკეტინგული აქტივობები, უკვე მზად არის ზამთრის საიმიჯო კლიპი, რომელიც „ეურონიუსზე“ იტრიალებს. მალე კონკრეტულ ბაზრებზე მარკეტინგული კამპანიაც დაიწყება.
ესაუბრა
ნათია კეკენაძე
