ამერიკის შეერთებული შტატები საქართველოსთან განათლების სფეროში თანამშრომლობის გაღრმავების სურვილს გამოთქვამს. ამის შესახებ საუბარია აშშ-სა და საქართველოს მიერ სტრატეგიული დიალოგის კომისიის სხდომის შედეგად გავრცელებულ განცხადებაში, სადაც ხაზგასმულია 2013 წელს ხელმოწერილი„ათასწლეულის გამოწვევის კორპორაციის“ მეორე კომპაქტის ისტორიული მნიშვნელობა.
როგორც “თბილისი თაიმსს” საგარე სამინისტროდან აცნობეს, „მხარეებმა აღნიშნეს „ათასწლეულის გამოწვევის კორპორაციის“ მეორე კომპაქტის ისტორიული მნიშვნელობა და მისი წვლილი საქართველოს სამუშაო ძალის განვითარების საქმეში მეცნიერების, ტექნოლოგიების, საინჟინრო და მათემატიკის მიმართულებებით, განათლების ხარისხის ამაღლებისა და პროფესიული გადამზადების სექტორში სტრატეგიული ინვესტიციების გზით.
აშშ-საქართველოს სტრატეგიული პარტნიორობის ქარტიის კომისიამ აღნიშნა აშშ-ის მიერ დაფინანსებული სტუდენტური გაცვლითი პროგრამებისა და აშშ-სა და საქართველოს უნივერსიტეტებს შორის თანამშრომლობის გაღრმავების მნიშვნელობა“- ნათქვამია განცხადებაში.
დოკუმენტში ასევე ხაზგასმულია ჯანდაცვის სფეროში თანამშრომლობის მიმართულებით მიღწეული პროგრესი. კერძოდ აღნიშნულია, რომ მხარეები შეთანხმდნენ შემდგომშიც გააღრმავონ პარტნიორული ურთიერთობები ჯანდაცვის სფეროში, მეცნიერების, გადამდები და არაგადამდები დაავადებების მართვის სექტორში ერთობლივი პროექტების მიმართულებით.
შეგახსენებთ, სტრატეგიული პარტნიორობის ქარტიის კომისია ამერიკის შეერთებულ შტატებსა და საქართველოს შორის სტრატეგიული ორმხრივი დიალოგის ძირითადი ფორმატია, რომლის მიზანსაც ქვეყნებს შორის თანამშრომლობის გაღრმავება და საქართველოს ევრო-ატლანტიკური ინტეგრაციის ერთობლივი მიზნის ხელშეწყობა წარმოადგენს. ქარტიის კომისიამ ყურადღება გაამახვილა ორმხრივი თანამშრომლობის გაძლიერებაზე ისეთ სფეროებში, როგორიცაა დემოკრატია, თავდაცვა და უსაფრთხოება, ეკონომიკა, ვაჭრობა და ენერგეტიკა, ხალხთაშორისი ურთიერთობები და კულტურული გაცვლები. ქარტიის კომისიის სხდომა 2015 წლის 2 ნოემბერს ვაშინგტონში გაიმართა. საქართველოს მხრიდან მას ვიცე-პრემიერი გიორგი კვირიკაშვილი, აშშ-ს მხრიდან კი ამერიკის სახელმწიფო მდივნის მოადგილე ენტონი ბლინკენი ხელმძღვანელობდა.
