გამოცდების ეროვნული ცენტრი ეხმაურება მედიაში გავრცელებულ ინფორმაციას, რომ თითქოს აბიტურიენტებისათვის სააპრობაციო დავალებები ხელმისაწვდომი გახდა.
განცხადებაში ნათქვამია, რომ ტესტური დავალებების შექმნის, შეფასების (საცდელი ტესტირების) და ბეჭდვისას დაცულია ყველა აუცილებელი და აპრობირებული ნორმა. პრაქტიკულად გამორიცხულია ერთიანი ეროვნული გამოცდების ტესტური დავალებების ბაზიდან დავალების ე.წ. “გაჟონვა”. ბაზაში გამოცდილი (აპრობაციაზე გატანილი) დავალებების მხოლოდ ნაწილი ხვდება, ისიც მოდიფიცირების შემდეგ. გარდა ამისა, ერთ კონკრეტულ საცდელ ტესტირებაზე გატანილი დავალებებით არ ხდება ტესტის საბოლოო ვერსიის შექმნა – ტესტში კონკრეტული საცდელი ტესტირებიდან მხოლოდ ერთეული დავალება ხვდება, ესეც დაცულობის მექანიზმია იმ შემთხვევისთვის, თუ აპრობაციის მონაწილემ დაიმახსოვრა რომელიმე ტესტური დავალება.
ამასთან, ტესტში დავალება შედის რედაქტირების შემდეგ და არა იმ სახით, როგორც საცდელ ტესტირებაზე იყო გატანილი. ასევე იცვლება პასუხების თანმიმდევრობა (რიგითობა).
აპრობაციებზე გასული დავალებების ნაწილის ნახვა აბიტურიენტებს დამხმარე მასალებშიც შეუძლიათ.
კონფიდენციალობა და უსაფრთხოების უპრეცენდენტო ზომებია დაცული ბეჭდვისას – ტესტები ბრიტანეთში, კონფიდენციალური მასალების ბეჭდვაში გამოცდილმა კომპანიამ „სტივენ ოსტინმა“ დაბეჭდა.
03.07.13
