ივანე ჯავახიშვილის სახელობის თბილისის სახელმწიფო უნივერსიტეტში სტუდენტებმა საპროტესტო აქცია გამართეს. სხვა აქციებისგან განსხვავებით, რომლებიც, ძირითადად, საგნების პრობლემატურ არჩევას, აკადემიური რეგისტრაციის სირთულეებსა და სხვა მსგავს თემებს უკავშირდება ხოლმე, ამ შემთხვევაში სტუდენტთა ნაწილი სტუდენტური თვითმმართველობის ღონისძიებებისთვის თსუ ბიუჯეტიდან თანხის გამოყოფას აპროტესტებდა. ასევე, მათი უკმაყოფილება უკავშირდებოდა უნივერსიტეტის კანცლერის კანდიდატს.
აქციის მონაწილე სტუდენტებს თსუ-ს რექტორ – აკადემიკოს ვლადიმერ პაპავასთან ერთად თსუს აკადემიური საბჭოს წევრები შეხვდნენ და მათ კითხვებს უპასუხეს. შეხვედრაზე ვლადიმერ პაპავამ სტუდენტებს სიმშვიდისა და კონსესუსისაკენ მოუწოდა.
„სტუდენტურ თვითმმართველობას და ე.წ სხვა სტუდენტებს შორის დაპირისპირების თემა ახალი არ არის, ეს წლებია გრძელდება და განსაკუთრებული სიმწვავე ამ თემას შესძინა კანცლერის არჩევნების პროცესმა. ამ პროცესში აკადემიურმა საბჭომ მეორე შერჩევისას დაასახელა კანდიდატი, რომელიც ადრე იყო დაკავშირებული სტუდენტურ თვითმმართველობასთან, რამაც გამოიწვია სხვა სტუდენტების მხრიდან პროტესტი. ჩემი, როგორც უნივერსიტეტის ხელმძღვანელის ამოცანა არის, რომ უნივერსიტეტში შევინარჩუნოთ მთლიანობა, უნივერსიტეტი არ იყოს გაყოფილი, არ იყოს განხეთქილება და რაც მთავარია, უნივერსიტეტი დაუბრუნდეს სწავლის და სამეცნიერო კვლევის კალაპოტს. სტუდენტებს უფლება აქვთ ნებისმიერი ფორმით გამოხატონ თავისი პროტესტი. უნივერსიტეტი ღია საჯარო სივრცეა. რაც შეეხება აკადემიურ საბჭოს, მისი ყოველი წევრი დამოუკიდებელია. აკადემიურ საბჭოს ინსტიტუციურად არ შეუძლია ამ ეტაპზე რაიმე გადაწყვეტილების მიღება. აკადემიური საბჭოს თითოეული წევრის პირადი საქმეა რა ნაბიჯს გადადგამს და ვის რას ურჩევს. ჩემი ნაბიჯი არის მიმართული იქითკენ, რომ უნივერსიტეტში არ იყოს განხეთქილება,- განაცხადა რექტორმა ვლადიმერ პაპავამ.
მარიამ ტაკაშვილი