იდეების ეპიდემია თბილისში – TEDxTbilisi 17 აპრილს ჩატარდება. TEDxTbilisi 2016-ის შესახებ დღეს ”საქართველოს ბანკის” სათავო ოფისში პრესკონფერენცია გაიმართა. ”საქართველოს ბანკი” უკვე მეოთხე წელია ამ ღონისძიების ოფიციალური მხარდამჭერია.
მეოთხე ყოველწლიური ღონისძიება 17 აპრილს, თბილისის ვ. სარაჯიშვილის სახელობის კონსერვატორიაში გაიმართება. TEDxTbilisi არის TED-ის მიერ ლიცენზირებული, დამოუკიდებლად ორგანიზებული ერთდღიანი ღონისძიება. TED წარმოადგენს არაკომერციულ ორგანიზაციას, რომლის მიზანი ინოვაციური და ინსპირაციული იდეების გაზიარებაა.
”წლევანდელი ღონისძიების თემა ინოვაციებისა და ტრადიციების დაპირისპირებაა. TEDxTbilisi-ის მაყურებლების მიერ ნომინირებული სპიკერები წარმოადგენენ პროექტებს და იდეებს, რომლებიც ინოვაციის და ტრადიციის გადაკვეთაზე ჩაისახა. ტრადიციულად, პროგრამა ძალზედ მრავალფეროვანია. გამომსვლელებს შორის არიან ასტროფიზიკოსი, მზარეული, მიკრო – ბიოლოგი, მომღერალი, ისტორიკოსი, მათემატიკოსი და ა.შ. დეტალური ინფორმაცია სპიკერებსა და მათ მოხსენებებზე ხელმისაწვდომია TEDxTbilisi-ის ინტერნეტ გვერდზე”, -აცხადებენ ”საქართველოს ბანკში”.
როგორც TEDxTbilisi-ს წარმომადგენელმა, მერი გაბაშვილმა აღნიშნა, TEDxTbilisi-სთვის სპიკერები სხვადასხვა მიზეზით არიან შერჩეულნი -ნაწილი მათთვის განკუთვნილი თემისადმი განსაკუთრებული სიყვარულისა და ერთგულების გამო, ზოგი ინსპირაციული მოსაზრებების.
”გასულ წლებში TEDx-მა უპრეცედენტო მხარდაჭერა და მოწონება დაიმსახურა, ამიტომ მოხარულები ვართ, რომ კვლავ გვეძლევა შესაძლებლობა ვუმასპინძლოთ მეოთხე ღონისძიებას. ჩვენთვის საამაყოა ღონისძიებაში ასეთი საინტერესო სპიკერების მონაწილეობა, ისევე, როგორც წარმოდგენილი თემების მრავალფეროვნება”, – განაცხადა მერი გაბაშვილმა.
”საქართველოს ბანკის” გენერალურმა დირექტორმა მურთაზ კიკორიამ კი აღნიშნა, რომ „საქართველოს ბანკი” თავიდანვე არის საქართველოში TEDx-ის ფორმატის კონფერენციის მხარდამჭერი და უცვლელი სპონსორი.
”ჩვენთვის მნიშვნელოვანია გამორჩეული და საინტერესო იდეების მქონე ადამიანებს, ჰქონდეთ შესაძლებლობა ფართო საზოგადოებას გააცნონ საკუთარი მიგნებები და, ამავე დროს, გააცნონ საქართველო მსოფლიოს“,- განაცხადა კიკორიამ.
