საქართველოს კულტურისა და ძეგლთა დაცვის მინისტრი მიხეილ გიორგაძე ბაქოში გაეროს ცივილიზაციათა ალიანსის მეშვიდე გლობალური ფორუმს ესწრება, რომლის მთავარი თემა ინკლუზიურ საზოგადოებაში თანაცხოვრობაა.
ღონისძიება აზერბაიჯანის პრეზიდენტმა ილჰამ ალიევმა გახსნა. სპეციალური ვიდეომიმართვა გაავრცელა გაეროს გენერალურმა მდივანმა პან გი მუნმა. მომხსენებელთა შორის არიან თურქეთის პრეზიდენტი რეჯეპ ტაიპ ერდოღანი და გაეროს ცივილიზაციათა ალიანსის უმაღლესი წარმომადგენელი ნასის აბდულაზიზ ალ ნასერი.
ფორუმს 140 ქვეყნის დელეგატი ესწრება და მისი მიზანია ხელი შეუწყოს ხალხთა შორის კულტურული დიპლომატიის განვითარებას. ფორუმზე ასევე განიხილება ისეთი საკითხები, როგორიცაა სიძულვილის ენა, ქალთა როლი სამშვიდობო მოლაპარაკებებში და სამოქალაქო საზოგადოების ჩართულობა დემოკრატიის პროცესში. ფორუმის ფარგლებში, რეგიონულ ენეგეტიკულ პროექტებში მონაწილე ქვეყნებთან ერთად შემუშავდება სახელმწიფოთა დაახლოების პროგრამა, რომელიც ამ ქვეყნებს შორის კულტურის, კულტურული მემკვიდრეობის და ტურიზმის სფეროში გამოცდილების გაზიარებას გულისხმობს. თანამშრომლობის მემორანდუმს ხელს ქვეყნების დელეგაციების ხელმძღვანელები მოაწერენ. ღონისძიების ბოლოს გამოვლინდება ინტერკულტურული ინოვაციური კონკურსის გამარჯვებული.
საქართველოს კულტურისა და ძეგლთა დაცვის მინისტრთან ერთად, ქართული დელეგაციის შემადგენლობაში არიან მინისტრის მოადგილე ლევან ხარატიშვილი და საქართველოს სრულუფლებიანი ელჩი აზერბაიჯანში თეიმურაზ შარაშენიძე. ისინი დაგეგმილ სესიებში იღებენ მონაწილეობა
