თურქეთის პარლამენტში საკონსტიტუციო ცვლილებების განხილვა ფიზიკურ დაპირისპირებაში გადაიზარდა. BBC-ს ცნობით, დეპუტატები მსჯელობდნენ ინიციატივაზე, რომლის თანახმად, სადეპუტატო ხელშეუხებლობა ჩამოერთმევა იმ დეპუტატებს, რომლებიც თურქეთში აკრძალულ ქურთისტანის მუშაკთა პარტიას უჭერენ მხარს.
ფიზიკური დაპირისპირება მმართველი პარტიისა და პროქურთული ოპოზიციური პარტიის წევრებს შორის მოხდა, რა დროსაც მათ ერთმანეთს წყლის ბოთლები დაუშინეს.
ხელჩართული ჩხუბის დროს რამდენიმე დეპუტატი დაშავდა, რის გამოც კომიტეტის სხდომა გადაიდო.
მსგავსი დაპირისპირება აღნიშნული ინიციატივის წინა განხილვის დროსაც მოხდა.
