მთავარი პროკურორის განცხადებით, ჟურნალისტ შალვა რამიშვილის საქმესთან დაკავშირებით მოხდება ყველა იმ პირის დაკითხვა, ვინც რამიშვილის განცხადებაში ფიგურირებს და ვის საჭიროებასაც გამოძიება დაინახავს.
”შალვა რამიშვილის განცხადება გადაგზავნილია შესაბამისი რეაგირებისთვის და როგორც ჩემთვისაა ცნობილი, მიმდინარეობს შესაბამისი მოქმედებები იმის დასადგენად, განცხადებაში მოყვანილი ფაქტები რამდენად შეესაბამება რეალობას. ასევე მიმდინარეობს ხალხის გამოკითხვა, რათა დადგინდეს მის განცხადებაში არსებული ფაქტების რეალობა,” – განაცხადა ირაკლი შოთაძემ.
ამასთან, მთავარი პროკურორის თქმით, არ ფლობს ინფორმაციას, დაიკითხა თუ არა ტელეკომპანია ”იმედის” ხელმძღვანელობა ან იუსტიციის უმაღლესი საბჭოს წევრები, თუმცა განაცხადა, რომ განცხადებაში დასახელებული ყველა პირი დაიკითხება.
შეგახსენებთ, რომ ჟურნალისტმა შალვა რამიშვილმა საქართველოს მთავარ პროკურატურას რამდენიმე კვირის წინ მიმართა და მასზე, როგორც ჟურნალისტზე განხორციელებული ზეწოლის ფაქტზე გამოძიების დაწყება მოითხოვა. მან, პროკურატურას მისი და ”იმედის” დირექტორს, გიორგი ბახტაძეს შორის მიმოწერაც წარუდგინა.
რამიშვილი ამტკიცებს, რომ გიორგი ბახტაძე სთხოვდა, იუსტიციის უმაღლესი საბჭოს მდივანს, ლევან მურუსიძეს გადაცემაში სტუმრობისას, არ ჰყოლოდა ოპონენტებად კრიტიკულად განწყობილი პირები.
