საქართველოს კულტურისა და ძეგლთა დაცვის სამინისტროს მხარდაჭერითა და კულტურის საერთაშორისო ცენტრის „მუზა“ ორგანიზებით, 9-15 მაისს გაიმართება პირველი საერთაშორისო სიმპოზიუმი „ქანდაკების არსი თანამედროვე სამყაროში“.
სიმპოზიუმში მონაწილეობას მიიღებენ ხელოვანები სხვადასხვა ქვეყნიდან: იტალია, ესპანეთი/მარბეა, თურქეთი, ირანი, საბერძნეთი, აზერბაიჯანი, იტალია, საფრანგეთი, ფინეთი; ღონისძიების ფარგლებში დაგეგმილია ვორქშოფები და პრეზენტაციები; სიმპოზიუმი საერთაშორისო სტანდარტებისა და ნორმების დაცვით ჩატარდება.
სიმპოზიუმი ქართველი ხელოვანებისა და მოქანდაკეების გამოფენით გაიხსნება. ღონისძიების დასრულების შემდეგ მომზადდება ხელოვნების საერთაშორისო არტ-კატალოგი, სადაც დეტალურად იქნება აღწერილი სიმპოზიუმის მიმდინარეობა; კატალოგში შევა ვიზუალური მასალა, სტატიები, პრეზენტაციების რეზიუმე, რაც ერთგვარი სახელმძღვანელო იქნება ხელოვნების სფეროს წარმომადგენლებისთვის.
საერთაშორისო სიმპოზიუმის მიზანს წარმოადგენს, ქართველი და უცხოელი ხელოვანების, მოქანდაკეების ერთ სივრცეში ინტეგრირება და თანამედროვე ქანდაკების აქტუალური საკითხებისა და ტენდენციების განხილვა, ახალი ტექნილოგიების და მიმართულებების დანერგვა.
