არმაზ ახვლედიანი პარტია ქართულ ოცნებას ტოვებს. ამის მიზეზად ის
ქართული ოცნების მიერ 2012 წელს ნაკისრი მთავარი ვალდებულებების შეუსრულებლობას ასახელებს.
პარტიის უკვე ყოფილი წევრი აცხადებს, რომ სამართლიანობისა და პროგრესის დროშით მოსული მმართველი პოლიტიკური ძალა თვითონვე იქცა სახელმწიფოს განვითარების შემაფერხებელ ფაქტორად.
არმაზ ახვლედიანი ამაში კონკრეტულ პოლიტიკოსებს ადანაშაულებს, რომელთაც, მისი თქმით, ცვლილებები არ უნდათ.
“პარტია ქართულმა ოცნებამ ვერ მოახერხა, ერთის მხრივ, გათავისუფლება პოლიტიკოსებისგან, რომლებიც ხელს უშლიან პარტიის დემოკრატიულ რელსებზე დაყენებას, მეორეს მხრივ, ვერ გახსნა კარი იმათთვის, ვინც ამ პროცესს ხელს შეუწყობდა, ამით, პრაქტიკულად, აცდა საზოგადოებრივ და სახელმწიფოებრივ დღის წესრიგს. დღეიდან, როგორც წარსულში, ახლაც, მომავალშიც ვაპირებ, აქტიურად ვიყო ჩართული პოლიტიკურ საზოგადოებრივ პროცესში,” – განაცხადა კურიერთან სატელეფონო საუბარში ახვლედიანმა.
საკუთარი გადაწყვეტილების მიზეზებზე საუბარს არმაზ ახვლედიანი დღეს 12 საათზე ჩანიშნულ ბრიფინგზე აპირებს.
წყარო: rustavi2.com
