ილიას სახელმწიფო უნივერსიტეტის ლაბორატორიაში, რომელსაც Fab Lab-ის სახელით ვიცნობთ, კიდევ ერთი ინოვაციური პროექტი განხორციელდა. იდეის ავტორები ნათია მგელაძე და ქეთი უბილავა არიან. ორი სტუდენტი დიზაინერი ხისა და ტყავის მასალით ქალბატონებისთვის ორიგინალური დიზაინის ჩანთებს ამზადებს. ჩანთების უნიკალურობას მასალების კომბინაცია განაპირობებს.
დიზაინერები ნატურალურ ხესა და ნატურალურ ტყავს იყენებენ, მნიშვნელოვანია გრავირების ფაქტორიც, რომელიც მომხარებლებს საშუალებას აძლევს სურვილისამებრ განათავსონ წარწერა საკუთარ ჩანთაზე. „ბეგელსის“ დამზადების პროცესში ჩანთის გვერდებისთვის იყენებენ წიფელს.
ამას გარდა, ჩანთას დაემატა ახალი, ინოვაციური ფუნქცია,რომელმაც ყველას ყურადღება მიიპყრო. „ბეგელსი“ ანათებს! – ჩანთებში led სანათებია ჩამონტაჟებული და ჩანთის მომხარება ღამის საათებში მეტად მოსახერხებელია. სანათი ინთება, როგორც სენსორულად, ისე მექანიკურად. მომხარებლებს დააინტერესებს ფასებიც, ჩანთების გასაყიდი ფასი, მასალის გათვალისწინებით, იწყება 25 ლარიდან და მერყეობს 150 ლარამდე.
„თბილისი თაიმსი“ პროდუქციის დაგეგმვისა და განხორციელების პროცესზე, სამომავლო გეგმებსა და სხვა დეტალებზე ერთ-ერთ დიზაინერს, ნათია მგელაძეს ესაუბრა.
როგორ შექმენით ჩანთების ბრენდი „ბეგელსი“, როგორია მისი დაარსების ისტორია?
– ჩანთის შექმნის ისტორია უკავშირდება ილიას უნივერსიტეტში ტექნოლოგიური დანადგარების ლაბორატორიის ფაბლაბის გახსნას, სადაც სტუდენტებს აქვს საშუალება განახორციელონ ინოვაციური იდეები ტექნოლოგიების გამოყენებით. შემდგომ, მივიღეთ მონაწილეობა პროექტში “დაიწყე ბიზნესი ფაბლაბთან ერთად”, რომლის ორგანიზატორი გახლდათ საქართველოს ინოვაციებისა და ტექნოლოგიების სააგენტო-„ ჯიტა“. პროექტის ფარგლებში გაგვიჩნდა იდეა, გვეწარმოებინა რაღაც ახალი, რაც აქამდე ფაბლაბში არავის გაუკეთებია.
თქვენ შექმენით ჩანთები,რომლებიც ანათებს,როგორია დამზადების პროცესი?
– ჩანთა, რომელიც ანათებს, ანათებს ლედ ნათურის საშუალებით. ის ინთება როგორც არსებული ღილაკით, ასევე აქვს ჩამრთველი, რომელიც მუშაობს სენსორზე. დამზადების პროცესს რაც შეეხება, არის ხანგრძლივი, რადგან ჩანთას აქვს ბევრი მასალა, რომელიც საჭიროებს დამუშავებას და შემდგომ, აწყობას. შეკვეთებს ვამზადებთ დაახლოებით, ორი კვირის განმავლობაში.
რა უპირატესობა აქვს ბეგელსს სხვა ჩანთებისგან,რამდენად მოსახერხებელია და რატომ უნდა აირჩიოს მომხმაებელმა იგი?
– ”ბეგელსის“ უპირატესობა მდგომარეობს იმაში, რომ მსგავსი პროდუქტი საქართველოში არ არსებობს. არა თუ საქართველოში, არამედ მსოფლიოს სხვა ქვეყნებშიც კი იშვიათია. ანალოგი არ არსებობს,რადგან მომხმარებლისთვის შექმნილია ყველანაირი პირობა შეიქმნას მისთვის სასურველი ჩანთა, არსებული სხვადასხვა სახის დიზაინით. მას შეუძლია დააგრავიროს ჩანთის ხის გვერდებზე ან უშუალოდ ტყავზე ნებისმიერი ტექსტი ან გადაიტანოს ნებისმიერი გამოსახულება, რომელიც ინდივიდუალურია. შესაბამისად, ყველა მომხმარებელს აქვს ჩანთა, რომლის ანალოგიც სხვას არ ექნება.
პროდუქციისრეალიზაციაზე, რომ გვესაუბროთ,ხართ თუ არა კმაყოფილები და სად უნდა შეიძინოს მომხარებელმა თქვენი ჩანთები და როგორია ფასები?
– ჩვენი ჩანთების შეკვეთა ხდება ონლაინ, ჩვენ გვერდზე-ბეგელსი. ფასები იწყება 45 ლარიდან და იზრდება იმის მიხედვით, ნატურალურია ტყავი თუ შემცვლელი, ასევე რა ზომის არის ჩანთა და რა დამატებითი დეტალები აქვს მას. შეკვეთები საკმაოდ ბევრია, სწორედ ამიტომ, დროის არც თუ ისე მცირე პერიოდია საჭირო დასამზადებლად.
რას ნიშნავს ბრენდის სახელი?
– ბრენდის სახელი კონკრეტულად არაფერს ნიშნავს, თუმცა, როდესაც თავიდან ვქმნიდით სახელს, ეს იყო ორი სიტყვის კომბინაცია: “Bag” და “Girls”. თავიდან იყო “BAGELS”, მაგრამ შემდგომ პირველივე დღეებში შეიცვალა და გახდა ” ბეგელსი” .
როგორიათქვენი სამომავლო გეგმები და უკავშირდება თუ არა იგი პროდუქციის საზღვარგარეთ გატანას?
– სამომავლო გეგმებში შედის პროდუქტის ასორტიმენტის გაზრდა, მასალების და დიზაინის ფართო არჩევანი მომხმარებლისთვის. ძალიან ბევრი მომხმარებელი უკვეთავს ჩანთას უცხოელი მეგობრისთვის, აქედან გამომდინარე, ჩვენი პროდუქცია საკმაოდ ბევრ ქვეყანაშია უკვე „ნამყოფი“. დუბაი, გერმანია, იტალია, ამერიკა, ავსტრია, რუსეთი, აზერბაიჯანი, თურქეთი და ასე შემდეგ. ეტაპობრივად ვცდილობთ, მივაწოდოთ ინფორმაცია უცხოურ ბაზარს ქართული ბრენდის შესახებ და გავიტანოთ მეტი პროდუქცია.
ნათია კეკენაძე
