„მიუხედავად ამ მახინჯი კონტროლის სისტემისა, მე მწამს, რომ სასამართლოში არიან კეთილსინდისიერი მოსამართლეები. თუ განაჩენი იქნება უარესი, ეფექტური საშუალებებით, მათ შორის ქუჩაშიც გამოვხატავთ ჩვენს პროტესტს. უდანაშაულო ადამიანის დატუსაღება არ შერჩენია არც ერთ პოლიტიკურ ძალას“. ე.წ „კაბელების საქმეზე“ დაგეგმილი სასამართლოს მოსალოდნელ განაჩენზე და შესაძლო საპროტესტო აქციებზე ისაუბრა პარტია „თავისუფალი დემოკრატების“ ლიდერმა ირაკლი ალასანიამ ტელეკომპანია „რუსთავი-2“-ზე, გადაცემა „არჩევანის“ ეთერში.
„პროკურორ შოთაძის განცხადება არის საგანგაშო. მან არ უნდა იცოდეს ამ საქმის დეტალები. ეს არის პოლიტიკურად დაგეგმილი შეტევა თავდაცვის სამინისტროზე. მართლმსაჯულების კონტროლი ამუხრუჭებს ჩვენს განვითარებას. მჯერა, რომ ინდივიდუალური გადაწყვეტილებები შეიძლება იყოს სისტემის შეცვლის წინაპირობა. შესაძლებელია განაჩენი იყოს კანონიერი და არა პოლიტიკური.
თუ ეს ადამიანები კვლავ მოხვდებიან ციხეში,ეს იქნება ბოლო წვეთი ჩვენს მოთმინების ფიალაში. თანამდებობა დავტოვე იმის გამო,რომ ვერ წარმომედგინა დამეტოვებინა ციხეში ეს ხუთი უდანაშაულო ადამიანი და მე გამეგრძელებინა მუშაობა. პოლიტიკაც არ მაინტერესებს თუ მათ არ დავუდგებით გვერდში. თუ ეს ასე მოხდა, დადასტურდება, რომ ბიძინა ივანიშვილი იყენებს პროკურატურას და სასამართლოს, როგორც პოლიტიკურ ბერკეტს. ეს იქნება ივანიშვილის რეჟიმის დასასრული“.
ირაკლი ალასანიამ შეაფასა ასევე „ქართულ ოცნებაში“მიმდინარე პროცესები.
„ „ქართულ ოცნებაში“ არის მართვადი ქაოსი. ეს ყველაფერი ხელს აძლევს არაფორმალურ მმართველს. მთავრობის მეთაური შეიცვალა უკვე ოთხი თვეა, მაგრამ პრაქტიკულად არანაირი გადაწყვეტილების მიღების უნარი მას არ აქვს.
„ნატო“-სკენ სვლა არის საზოგადოების არჩევანი და ეს ჩანს ყველა კვლევაში. ხალხი თავს თვლის ევროპელად. ყველანაირ აზრს აქვს გამოხატვის თავისუფლება, მაგრამ ეს არის წმინდა რუსული პროპაგანდა. არაქმედითია ქართული ოცნება, როგორც უმრავლესობა. ეს შიდა დაპირისპირება გადადის ხალხის მდგომარეობაზე. ბიძინა ივანიშვილი და ეს ეკონომიკური გუნდი აფერხებს ინვესტიციას საქართვლოში“.
მანანა ღოღობერიძე
