„დიდი სხვაობაა კარალეთის და კორცხელის ინციდენტებს შორის. აქ იყო უშუალოდ პროვოკაცია „ნაციონალური მოძრაობის“ მხრიდან. იქ კი პირდაპირ დავალებები იყო გაცემული, არანირი პროვოკაცია ჩვენი მხრიდან არ ყოფილა“. ამის შესახებ პარტია „ქართული ოცნების“ აღმასრულებელმა მდივანმა ირაკლი კობახიძემ „ტვ-პირველზე“, გადაცემა „ინგა გრიგოლიას დღის ამბებში“ ისაუბრა.
„ეს არ არის პირველი შემთხვევა, ეს „ნაციონალური მოძრაობის“ ხელწერაა. გახსოვთ როგორი პრინციპებით მოქმედებდა წინა ხელისუფლება. ის თავად იყო აგრესიის წყარო. ისევე, როგორც გარდაბანში საარჩევნო პროცესების მიწურულს, მათ მაინც მოახერხეს სპექტაკლის დადგმა. ქვები ესროლეს ჩვენი ერთ-ერთი აქტივისტის მანქანას, გამოიწვიეს პროვოკაციაში და ასე ჩაწერეს ერთი სიუჟეტი. ამ სპექტაკლის საშუალებით მოახერხეს ჩრდილი მიეყენებინათ საარჩევნო პროცესისთვის. იგივე გაიმეორეს კორცხელში.
ვადასტურებ,რომ ეს ადამაინები, მათ შორის სპორტსმენები იყვნენ ჩვენი აქტივისტები. „ნაციონალურ მოძრაობას“ ჰყავდა მობილიზებული ე.წ ზონდერები. 15 კაცი იყო სამარშრუტო მანქანაში, მათ ჰქონდათ ბიტები. ამ პროვოკაციაში პირადად მონაწილეობდა ბოკერია და მელია. დაიწყეს შესასვლელის ბლოკირება. ნიკა მელია მივიდა ჩვენს მშვიდობიან აქტივისტებთან და მათ ზონდერები უწოდა. ჩვენ ინსტრუქციები გვქონდა გაცემული, რომ არ აჰყოლოდნენ არანაირ პროვოკაციას, თუმცა ქართველები ემოციური ხალხი ვართ და ეს ჩვენი დავალება სრულფასოვნად ვერ შეასრულეს.
ბუნებრივია ეს ინციდენტი ჩრდილს აყენებს ჩვენს პოლიტიკურ ძალასაც. მიუხედავად ამისა ჩვენ მთლინობაში 70%-იანი შედეგი დავდეთ. არჩევნების შედეგებს ყალბი ინტერპრეტაცია მიეცა. ეს ყველაფერი მიუთითებს,რომ 2016 წლის არჩევნებს დიდი უპირატესობით მოვიგებთ,“ – განაცხადა ირაკლი კობახიძემ.
მანანა ღოღობერიძე
