„ჩვენ გვქონდა მიცემული ინსტრუქტაჟი და ეს ითვალისწინებდა, რომ შეურაცხყოფის შემთხვევაში რეაქცია არ უნდა ჰქონოდათ. იყო ზეწოლის, უბნის ჩაშლის რისკები, ერთადერთი ამოცანა იყო გართულებების პრევენცია“. კორცხელის ინციდენტის დეტალებზე და დაპირისპირების გამომწვევ მიზეზებზე „ქართული ოცნების“ აღმასრულებელმა მდივანმა ირაკლი კობახიძემ „პალიტრა ნიუსზე“, გადაცემა „360 გრადუსის“ ეთერში ისაუბრა.
„პირდაპირი დავალება იყო, რომ არანაირ პროვოკაციას არ აჰყოლოდნენ. გინებაზე და ხელის გაწევაზეც არ უნდა ჰქონოდათ რეაქცია. რა თქმა უნდა ძალადობას არ ვამართლებ, თუმცა ქართველები ვართ და ბუნებრივია ვიღაცას ნერვები უმტყუნებს.
საქართველოში რადიკალურად უნდა შეიცვალოს პოლიტიკური და სამოქალაქო კულტურა. სრულიად ვიზიარებ პრემიერის ინიციატივას. სანქციების გამკაცრება აუცილებელია, ამას პოზიტიური შედეგი ექნება. არსებული მუხლი არ ითვალისწინებს არავის დაპატიმრებას. სამართალდამცავი ვერ დააკავებს პირს.
გამოძიების გაჭიანურებაზე ვერავინ ისაუბრებს. რეალურად რეაგირება იმავე დღესვე მოხდა. მოწმეების დაკითხვა დაიწყო მყისიერად. სადავო არის მხოლოდ პოლიციელთა რაოდენობა. იქ 15-მდე პოლიციელი იყო მობილიზებული, თუმცა მათ მაინც მოახერხეს სიტუაციის განმუხტვა. ჩვენ პასუხისმგებლობას ვაცნობიერებთ. ანალოგიური სახით „ნაციონალურ მოძრაობას“ ჰყავდა მობილიზებული ზონდერ ჯგუფები, მაგალითად წყალტუბოში. აკაკი ბობოხიძეს კუნთმაგარი პირები ჰყავდა ჩამოყვანილი ხონიდან. კორცხელში იყვნენ შეიარაღებულები ბიტებით. მე, რომ ზუსტად ისე მოვქცეულიყავი როგორც ნიკა მელია, იგივე რეაქცია მოჰყვებოდა.
ნიკა მელია, რომ სხვას ზონდერს უწოდებს, ბუნებრივია ემოციები მატულობს. ეს იყო უმძიმესი და უბინძურესი პროვოკაცია, ბოკერიას მიერ დაგეგმილი და მელიას მიერ შესრულებული. ისინი კიდევ შეეცდებიან ამომრჩეველზე პროვოკაციას, ჩვენ უნდა დავიცვათ ჩვენი უბანი და ამომრჩეველი. აქტიურად ვუმუშავებთ, რომ თავიდან ავირიდოთ ყველანაირი ძალადობა. „ნაციონალურმა მოძრაობამ“ თავის მიზანს მიაღწია. ეს პროვოკაცია იყო გათვლილი საგარეო მოხმარებაზე, მათ უკვე გააგზავნეს საკმარისი ინფორმაცია ქვეყნის გარეთ,“ – გაანცხადა ირაკლი კობახიძემ.
მანანა ღოღობერიძე