რამდენად გამართული ინფრასტრუქტურით ხვდება ქვეყანა ტურისტებს?!

ბოლო დროს აქტიურად გამოვთქვამთ პრეტენზიას – ვიყოთ ტურისტული ქვეყანა, რომელიც, ვფიქრობ, ცალსახად სწორი სურვილი და მისწრაფებაა.

თუმცა, საკითხავია, რამდენად კარგად შევძლებთ სასურველი მასპინძლობის გაწევას და როგორ შთაბეჭდილებას დავტოვებთ იმ ადამიანებში, რომლებიც პირველად ესტუმრებიან ჩვენს ქვეყანას? მასპინძელი ქვეყნის მთავარი მიზეზიც ხომ ეს არის, მოახდინოს იმგვარი შთაბეჭდილება სტუმარზე, რომ ამ უკანასკნელს უკან დაბრუნების სურვილი ბევრჯერ გაუჩნდეს.

ხშირად გვსმენია უცხოელი სტუმრების მიერ ქართული კერძების, ლამაზი ლანდშაფტებისა თუ განსხვავებული კულტურის მიმართ ქება, რომელიც ყოველ ჩვენგანს სიამაყით ავსებს ხოლმე. თუმცა, სამწუხაროდ, არის საკითხები, რომლებიც ტურისტებს ჩვენს ქვეყანაში აწუხებთ და დისკომფორტს უქმნით. ეს გახლავთ, ტურისტული დანიშვნულების ადგილებში დაბინძურებული გარემო, მოუწესრიგებელი სველი წერტილები, რუკებისა და ბროშურების ხელმიუწვდომლობა და სხვა.

რამდენად გამართული ინფრასტრუქტურით ხვდება ქვეყანა ტურისტებს, ასევე  რა რაოდენობის ტურისტის შემოსვლას ელოდება ტურუზის ადმინისტრაცია, აღნიშნულ სკითხებზე, „თბილისი თაიმსს“ ტურიზმის ეროვნული ადმინისტრაციის ხელმძღვანელი, გიორგი ჩოგოვაძე ესაუბრა.

ზაფხულის დადგომასთან ერთად იზრდება ტურისტთა რიცხვი. რა სიახლეებია თბილისსა და სხვა საკურორტო ზონებში როგორც ინფრასტრუქტურის მხრივ, ასევე იმ პრობლემების მოგვარებასთან დაკავშირებით, რომლებიც წიან სეზონზე აწუხებდათ ტურისტებს (საპირფარეშოების მოწესრიგება ტურისტულ ზონებში, ბუკლეტების და რუკების ხელმისაწვდომობა, ასევე, ტაძრებსა და სხვა კულტურულ ძეგლებთან მოკლე ისტორია მათ შესახებ ინგლისურ ენაზე).

– უახლოეს მომავალში, კულტურული მნიშვნელობის ძეგლებთან განთავსდება საინფორმაციო დაფები. სვანეთში და ყაზბეგის მუნიციპალიტეტში დაახლეობით 50 დაფა დამონტაჟდება.  ამ ეტაპზე მიმდინარეობს ტექსტუალური და ვიზუალური ნაწილის დამუშავება, ასევე იმ ლოკაციების შეთანხმება, თუ სად უნდა დამონტაჟდეს დაფები.

რაც შეეხება სველ წერტილებს, 2016 წლის 15 აპრილის მთავრობის განკარგულების თანახმად, სახელმწიფო უწყებებს დაევალათ შესაბამისი ქმედებების განხორიელება, რომ ეს პრობლემა მოგვარდეს.

ტურიზმის  ეროვნულმა ადმინისტრაციამ კომპეტენციის ფარგლებში იმ ადგილების იდენტიფირება  მოახდინა, სადაც არ არის სველი წერტილები ან არასაკმარისად არის.  ინფრასტრუქტურის მოსაწყობად ვადა 2016 წლის 30 ივინისით განისაზღვრა. 

დაახლოებით რა რაოდენობის ტურისტებს ელოდებით?

– შემიძლია თამამად გითხრათ, რომ წელს საქართველოში საერთაშორისო მოგზაურთა რაოდენობა კიდევ უფრო გაიზრდება და ახალ რეკორდებს მივაღწევთ.  ტენდენცია არის ძალაინ დინამიური. იანვრიდან მოყოლებული დღემდე, საქართველოში საერთაშორისო მოგზაურთა  უპრეცენტოდ გაზრდილი რაოდენობა ფიქსირდება.   მინდა ხაზი გავუსვა, რომ დაახლოებით ერთი წლის წინ, მთავრობის ერთობლივი და აქტიური ძალისხმევით, ჩვენ მოვახერხეთ დადებითი და პოზიტიური ტენდენციის ჩამოყალიბება საერთაშორისო მოგზაურთა რაოდენობის გასაზრდელად, ჩვენ ჩავატარეთ აქტიური მარკეტინგული კამპანიები საერთაშორისო მიზნობრივ ბაზრებზე, მოწვეული გვყავდა 400-ზე  მეტი ჟურნალისტი, შედეგად, შარშან, აპრილიდან დაწყებული, საერთაშორისო მოგზაურების ზრდის ტენდენცია დღემდე გრძელდება.  2015 წელს ქვეყანას 5,901,094  საერთაშორისო მოგზაური ეწვია, ზრდა, წინა წელთან შედარებით, +7%-ია. ზრდის ტემპი წელს კიდევ უფრო მაღალია. 4  თვის მონაცემებით, საქართველოში შემოსული საერთაშორისო მოგზაურების რაოდენობამ 1 596 916 შეადგინა, ზრდა 15,4%-ია. 

მარიამ ტაკაშვილი